नारायणी अस्पतालको एनआईसीयु वार्डको स्टोरमा आगलागी

हेल्थ आवाज मंगलबार, २०८२ भदौ ३१ गते, ११:१२ मा प्रकाशित

वीरगन्ज—वीरगन्जस्थित नारायणी अस्पतालको एनआईसीयु वार्डको स्टोरमा आगलागी भएको छ । मंगलबार विहान सबेरै विजुलीको तार सर्ट भएर आगलागी भएको अस्पतालका प्रवक्ता डा. उदयनारायण सिंहले जानकारी दिए ।

‘विद्युत सर्ट भएर एनआईसीयुको स्टोर कोठामा आगलागी भएको हो,’ डा. सिंहले भने, ‘आगलागीबाट अक्सिजनको पाइप, मनिटरलगायतका स्टोरका सामाग्रीहरुमा क्षति पुगेको छ ।’

एनआईसीयुको स्टोर अस्पतालको प्रसूति गृहको तेस्रो तल्लामा रहेको थियो । आगलागी भएलगतै नियन्त्रणमा आएकाले कुनै ठूलो क्षति नभएको उनले बताए । अहिले अस्पतालले एनआईसीयुका बिरामी अर्को विभागमा सारेर उपचार गरिरहेको छ ।

आगलागी लगतै वीरगन्ज महानगरपालिकाको दमकलले आगो नियन्त्रणमा लिएको थियो । आगलागीबाट भएको क्षति विवरण भने संकलन भइरहेको प्रवक्ता डा. सिंहले जानकारी दिए ।