लुम्बिनी प्रादेशिक अस्पतालले पिसिआर परीक्षणमा लाग्ने शुल्क घटायो

बुटवल – लुम्बिनी प्रादेशिक अस्पतालले पिसिआर परिक्षणमा लाग्ने परीक्षण शुल्क घटाएको छ । अब लुम्बिनी प्रादेशिक अस्पतालमा शुल्क तिरेर परीक्षण गराउनेलाई २ हजार ५ सय लाग्नेछ । यसअघि अस्पतालले ४ हजार ५ सय रुपैयाँ लिँदै आएको थियो ।

अस्पतालले नयाँ लागु गरेको शुल्क सोमबारबाट लागु हुने अस्पताल व्यवस्थापन समितिका अध्यक्ष सुर्य बहादुर भट्टराईले बताए । स्वाव लिएको २४ घण्टा भित्रै पिसिआर रिपोर्ट उपलब्ध गराउने समेत उनले बताए ।

अस्पतालले गएको असार २१ गतेदेखि कोरोना परिक्षण सुरु गरेको थियो । हलसम्म अस्पतालमा १२ हजार ९ सय ७५ जनाको पिसिआर परिक्षण गरेकोमा ९ सय ७७ जनामा पोजेटिभ देखिएका छन् ।