प्रदेश १ का स्वास्थ्यमन्त्री यादवलाई कालो झण्डा देखाइयो, पाँच जना प्रहरी नियन्त्रणमा

हेल्थ आवाज आईतबार, २०७९ साउन २९ गते, १९:२८ मा प्रकाशित

विराटनगर-प्रदेश नं.१ का स्वास्थ्यमन्त्री जयराम यादवलाई युवाहरूले कालो झण्डा देखाएका छन् । आइतबार उर्लावारी—३ मंगलबारेस्थित मदन भण्डारी अस्पताल तथा ट्रमा सेन्टरको नयाँ ओपीडी भवन उद्घाटन गर्न पुगेका स्वास्थ्यमन्त्री यादवलाई मंगलवारे युवा क्लबका अध्यक्ष पिपलराज गिरीको नेतृत्वमा आएको टोलीले कालो झण्डा देखाएको हो ।

क्लबले नयाँ ओपीडी भवन निर्माणमा अनियमितता भएको भन्दै निर्माणको आम्दानी खर्च सार्वजनिक गर्न माग राख्दै आएको थियो ।

कालो झन्डा देखाउने गिरिसँगै क्लबका महासचिव रेशु कटुवालसहित पाँच जनालाई इलका प्रहरी कार्यालय उर्लावारीले पक्राउ गरेको छ । प्रहरीले सदस्यहरू शेखर खड्का, प्रदीप दाहाल र प्रतीक पाण्डेलाई प्रहरीले नियन्त्रणमा लिएको इप्रका उर्लावारीले जनाएको छ ।

प्रहरीले नियन्त्रणमा लिएका युवाहरूलाई कार्यक्रम सकेपछि छोडने तयारी गरेको छ ।