१५ शैय्याको अस्पताल निर्माण गर्ने विषयमा दुई वडाका स्थानीय विवाद हुँदा झडप, २५ जना घाइते

बैतडी—बैतडीको मेलौलीमा अस्पताल निर्माणको विषयलाई लिएर दुई वटा वडाका स्थानीयबीच विवाद भएको छ । बिहीबार साँझ १५ शैय्याको अस्पताल कुन वडामा निर्माण गर्ने भन्ने विषयमा विवाद भएपछि झडप भएको थियो ।

उक्त झडपमा क्रममा २५ जना स्थानीय घाइते भएको बैतडीका डिएसपी प्रेमबहादुर शाहीले जानकारी दिए । ‘२५ जना घाइते भएको जानकारी हामीलाई प्राप्त भएको छ । उहाँहरुको अवस्था सामान्य छ,’ उनले भने, ‘झडप चाहिँ भएकै हो । अहिले स्थिती सामान्य छ । नगरपालिकाले मेलौली—१ मा १५ शैय्याको अस्पताल बनाउने निर्णय गरेको थियो ।

उक्त निर्णयमा मेलौली—७ का स्थानीय वासिन्दाले असहमति राख्दैं आफ्नो वडामा अस्पताल बनाउन माग गरेका थिए । त्यही विषयमा दुई वडाका स्थानीयबीच कुटाकुट भएको हो ।

स्थानीयबीच कुटाकुट हुन थालेपछि प्रहरीले हस्तक्षेप गरेको थियो । अहिले अवस्था सामान्य रहेको छ । स्थानीयबीचको विवादका कारण ९ वर्षदेखि अस्पताल निर्माणको काम अगाडि बढ्न सकेको छैन ।