चालकलाई कोरोना देखिएपछि स्वास्थ्य सचिव होम क्वारेन्टाइनमा

काठमाडौं—स्वास्थ्य तथा जनसंख्या मन्त्रालयका सचिव लक्ष्मण अर्याल होम क्वारेन्टाइनमा बसेका छन् । चालकमा कोरोना पोजेटिभ देखिएपछि उनी आइतबारदेखि बेलुकादेखि होम क्वारेन्टाइनमा बसेको मन्त्रालय स्रोतले जानकारी दिएको छ ।

सचिव अर्याल एक हप्ता होम क्वारेन्टाइनमा बसेर पिसिआर परीक्षण गरेपछि मात्रै मन्त्रालय आउने तयारीमा छन् ।

‘सचिवज्यूले घरबाटै नियमित ब्रिफिङ लिने दिने गरिरहनुभएको छ,’ मन्त्रालय स्रोतले भन्यो, ‘उहाँको सवारी चालकमा कोरोना पोजेटिभ देखिएपछि उहाँ होम क्वारेन्टाइनमा हुनुहुन्छ ।’

पछिल्लो समय स्वास्थ्य तथा जनसंख्या मन्त्रालयका कर्मचारीहरुमा कोरोना संक्रमण देखिन थालेसँगै मन्त्रालय हुने बैठकहरु कम गरिएको छ । अहिलेसम्म मन्त्रालयका ५ जना कर्मचारीमा कोरोना संक्रमण देखिएको छ ।