स्वास्थ्य मन्त्रालयमा बसेर काम गर्ने डब्‍ल्‍यूएचओका एक कर्मचारीलाई कोरोना पुष्टि

काठमाडौँ –  कोभिड-१९का लागि टेकनिकल सपोर्ट गर्न स्वास्थ्य मन्त्रालयमा बसेर काम गरीरहेका विश्व स्वास्थ्य संगठनका एक कर्मचारीलाई कोरोना संक्रमण पुष्टि भएको छ ।  स्वास्थ्य आपतकालिन कार्यसन्चालन केन्द्र(एचइओसी)मा रहेर काम गर्दै आएका सो कर्मचारीलाई आइतबार कोभिड-१९ पुष्टी भएको हो ।

मन्त्रालयका एक उच्च अधिकारीले दिएको जानकारी अनुसार उनलाई कोरोना संक्रमण पुष्टि  भएसँगै स्वास्थ्य तथा जनसंख्या मन्त्रालयका २० भन्दा बढी कर्मचारीहरु क्वारेन्टाइनमा बसेका छन् ।

स्वास्थ्यका आपतकालिन समयमा काम गर्ने सो केन्द्र मार्फत कोभिड-१९ का सम्पूर्ण कार्य हुँदै आएको थियो । डब्लुएचओका ती अधिकारीलाई संक्रमण भएसँगै मन्त्रालयका प्रवक्ता सहित उच्च अधिकारी क्वारेन्टाइनमा बसेको मन्त्रालय स्रोतले जनाएको छ ।

एचइिओसीले सम्भावित संक्रमणको जोखिमलाई हेरेर यसअघिनै अनलाइन मिटिङ्गबाट काम गर्ने प्रक्टीस गर्दै आएको थियो ।  मन्त्रालय स्रोतका अनुसार एचइओसीमा सम्पर्कमा रहेका मन्त्रालयका केही अधिकारीहरु होम क्वारेन्टाइनमा बसेका छन् भने केही होटल क्वारेन्टाइमा गएका छन् ।