आँगनबाट लडेकी सुत्केरी र नवजात शिशुको मृत्यु

सुर्खेत– कर्णाली प्रदेशमा सुत्केरी र नवजात शिशुको मृत्यु भएको छ । कर्णाली प्रदेश अस्पताल सुर्खेतमा शल्यक्रियामार्फत बच्चा जन्माएकी दैलेख नारायण नगरपालिका–११ की दीपा विक र उनको नवजात शिशुको मृत्यु भएको हो ।

दीपा मंगलबार भगवतीमाई गाउँपालिका–२ स्थित माइती घरको आँगनबाट लडेकी थिइन् । उपचारका लागि दैलेख अस्पताल लगिएको थियो । दीपाका श्रीमान खड्क विककाअनुसार दैलेख अस्पतालबाट सुर्खेत रिफर गरिएको हो ।

बुधबार बिहान सात बजे प्रदेश अस्पताल पु¥याउँदा उनी बेहोस अवस्थामा रहेको अस्पतालका मातृ–शिशु स्वास्थ्य सेवा प्रमुख कल्पना थापाले बताइन् ।

बिरामी प्रदेश अस्पताल पु¥याउदा नै अचेत भएकाले कृत्रिम स्वास–प्रस्वास दिएर भेन्टिलेटरमा राखिएको थियो । भेन्टिलेटरमै हुँदा सुत्केरी गराइएको अस्पताललले जनाएको छ ।

थापाकाअनुसार बुधबार विहान साढे ११ बजे बच्चा निकालिएको थियो । पेटभित्रै मरिसकेको बच्चाको तौल दुई किलो आठसय ग्राम थियो । बच्चा निकालेको केही समयपछि आमाको पनि मृत्यु भएको हो ।