विराटनगर—नेपाल चिकित्सक संघ कोशी विराटनगरको अध्यक्ष डा. फरवार्ड सिलवाल पुनः निर्वाचित भएका छन् । सिलवालले ३ सय ६१ मत ल्याएर अध्यक्षमा निर्वाचित भएका हुन् ।
सोमबार राति सार्वजानिक भएको निर्वाचनको मत परिमाणअनुसार सिलवालले प्रतिस्पर्धी डा. कैलाश श्रेष्ठलाई ९० मत अन्तरले पराजित गरेका छन् । संघमा श्रेष्ठ समूहबाट वरिष्ठ उपाध्यक्ष, कोषाध्यक्ष र एक जना सदस्य गरी तीन जना पदाधिकारीबाहेक सबै पदमा सिलवालको समूह निर्वाचित भएको छ ।
संघको वरिष्ठ उपाध्यक्षमा श्रेष्ठ समूहबाट डा. सन्जीवकुमार ठाकुरले ३ सय १८ मत ल्याएर निर्वाचित भए । उनका प्रतिस्पर्धी डा. नवीन कर्णले ३ सय २ मत प्राप्त गरेका छन् । उपाध्यक्षमा डा. बालकृष्ण साहलाई २५ मत अन्तरले हराउँदै डा. यज्ञराज खरेल निर्वाचित भएका छन् । खरेलले ३ सय २२ मत प्राप्त गर्दा साहले २ सय ९७ मत ल्याए ।
महासचिवमा डा. राजेन्द्र चौधरी निर्वाचित भए । चौधरीले ३ सय ५१ मत ल्याएर विजयी भए भने डा. रविराज सिंहले २ सय ७५ मत प्राप्त गरेका छन् । कोषाध्यक्षमा डा. सुधीर श्रेष्ठले ३ सय १० मत ल्याएर निर्वाचित भएका छन् । उनका निकटतम प्रतिस्पर्धी शिलवन्त सेन श्रीवास्तवले ३ सय ६ मत ल्याए । सह—कोषाध्यक्षमा डा. जुविन सिलवालले ३ सय ८० मत ल्याएर निर्वाचित भए । उनका प्रतिस्पर्धी डा. सरवेस कुमार झाले २ सय ४८ मत प्राप्त गरेका छन् ।
सह—सचिवमा सुनिल रेग्मीले ३ सय ६८ मत ल्याएर निर्वाचित भए । उनका प्रतिस्पर्धी डा. धिरज सिंहले २ सय ५९ मत ल्याए । सदस्यहरूमा डा. रोशन खड्का ३ सय १७, डा. अमरकुमार यादव ३ सय २५, डा. अरबेन्द्र कुमार महतो ३ सय २५, डा. अन्जु देव ३ सय ९३, डा. पार्थ गुरागाई ३ सय १८ र प्रेरणा दाहालले ३ सय ५० मत ल्याएर निर्वाचित भएका छन् ।
