कास्कीमा कडाइ गर्दै १० भदौसम्म निषेधाज्ञा, सवारीमा जोर-बिजोर प्रणाली

पोखरा – कास्की प्रशासनले निषेधाज्ञामा थप कडाइ गर्दै म्याद थप गरेको छ । जिल्ला प्रशासन कार्यालय कास्कीले १० भदौ राति १२ बजेसम्म निषेधाज्ञा आदेश जारी गरेको जनाएको हो ।

यस्तै, सार्वाजनिक तथा निजी सवारी साधनमा जोर बिजोर प्रणाली निर्धारण गरेको छ । प्रशासनका अनुसार जोर गते जोर र बिजोर गते बिजोर सवारी प्रणाली लागु गरिएको छ । कोरोना संक्रमणमा केही कमी आएपछि जोर-बिजोर प्रणाली हटाएको कास्की प्रशासनले पुनः सवारीमा जोर बिजोर लागु गरेको हो ।

सार्वजनिक यातायातमा पूर्ण स्वास्थ्य मापदण्ड अपनाउन र स्वीकृत सिटभन्दा बढी यात्रु नराख्न आग्रह गरेको छ । अत्यावश्यक सेवाका सवारीमा भने जोरबिजोर लागु नहुने प्रशासनले उल्लेख गरेको छ ।

यस्तै, तनहुँ प्रशासनले ७ भदौसम्म निषेधाज्ञा तोकेको छ भने स्याङ्जा र नवलपुरमा १० भदौसम्म निषेधाज्ञा कायम छ ।