राप्ती स्वास्थ्य विज्ञान प्रतिष्ठानमा १ सय विगाहामा ४ सय शैय्याको अत्याधुनिक अस्पताल बन्दैं

काठमाडौं—राप्ती स्वास्थ्य विज्ञान प्रतिष्ठानको चौथो सिनेट बैठकले ४ सय बेडको अत्याधुनिक अस्पताल बनाउने प्रस्ताव पारित गरेको छ । बहुवर्षीय योजनाअन्र्तगतको सो कार्यक्रमको लागि यस वर्षको लागि १ अर्ब रुपैयाँ सरकारसँग माग गर्ने निर्णय भएको प्रतिष्ठानकी उपकुलपति प्रा.डा. संगीता भण्डारीले जानकारी दिइन् ।

अस्पताललगायतको भौतिक संरचना निर्माणसँगै शैक्षिक कार्यक्रम पनि क्रमागत रुपमा सुरु गर्ने निर्णय भएको छ ।

लुम्बिनी प्रदेशको दाङमा रहेको सो प्रतिष्ष्ठान ४ वर्षअघि स्थापना भएको हो । साविकको राप्ती अस्पताललाई नै प्रतिष्ठानको अस्पतालका रुपमा प्रयोग गरिदै आएको छ । सो प्रतिष्ठानलाई अत्याधुनिक अस्पताल र शैक्षिक हब बनाउनका लागि अस्पताल परिसरबाट १० किलोमिटरको वरीपरी ४ ठाँउमा दाताबाट १०० विगाहा जग्गा प्राप्ति भइसकेको छ ।

शुक्रवार बसेको सिनेट बैठकले सो जग्गालाई प्रतिष्ठानको स्वामित्वमा ल्याउन मन्त्रिपरिषद् लैजाने निर्णयसमेत गरेको उपकुलपति डा. भण्डारीले बताइन् । ‘चौथो सिनेटले ४ सय बेडको अस्पताल निर्माण गर्ने र प्रतिष्ठानलाई प्राप्त झण्डै १०० बिगाहा जग्गा क्याविनेटमा पेश गर्नेलगायतका निर्णय गरेको छ,’ उनले भनिन् ‘अहिलेसम्म जग्गाको सुनिश्चितता नहुँदा धेरै कुरा रोकिएको थियो ।’