राप्ती स्वास्थ्य विज्ञान प्रतिष्ठानको उपकुलपति सिफारिसका लागि सर्च कमिटी गठन

काठमाडौं—राप्ती स्वास्थ्य विज्ञान प्रतिष्ठानको उपकुलपति सिफारिसका लागि स्वास्थ्यमन्त्री विरोध खतिवडाको नेतृत्वमा तीन सदस्सीय सर्च कमिटी गठन गरिएको छ । बिहीबारको क्याबिनेटको बैठकले वर्तमान उपकुलपति प्रा.डा. संगीत भण्डारीको कार्यकाल २६ मंसिरमा सकिन लागेपछि सर्च कमिटी गठन गरेको हो ।

उक्त सर्च कमिटीमा स्वास्थ्य सचिव डा. रोशन पोखरेल र नेपाल मेडिकल काउन्सिलका अध्यक्ष प्रा.डा. भगवान कोइराला सदस्य रहेका छन् । सर्च कमिटीले उपकुलपतिका आवेदन माग गर्नेछ ।

आवेदकमध्येबाट तीन जनाको नाम सर्टलिष्ट गरेर प्रधानमन्त्री तथा प्रतिष्ठानका कुलपतिलाई सिफारिस गर्नेछ । सिफारिस भएका तीन नामबाट एक जनालाई प्रधानमन्त्रीले प्रतिष्ठानको उपकुलपति नियुक्त गर्नेछन् ।