फाइजरको कोभिड चक्कीलाई अमेरिकाको स्वीकृती, मृत्युको जोखिम ८८ प्रतिशतसम्म कम गर्ने दावी

अमेरिकाको खाद्य तथा औषधी प्रशासन (एफडीए)ले कोभिड उपचारमा फाइजरको चक्की प्याक्सलोभिडलाई स्वीकृती दिएको छ। एफडीएले बुधबार कोभिड उपचारका लागि सफलतापूर्वक तयार गरिएको फाइजरको प्याक्सलोभिड चक्कीलाई स्वीकृती दिएको हो।

सो चक्की १२ वर्षभन्दा माथिका उच्च जोखिम संक्रमितलाई दिन सकिनेछ। यो पहिलो औषधी हो जुन नयाँ संक्रमित बिरामीहरूले अस्पताल बाहिर घरमै बसेर पनि लिन सक्नेछन्। कोरोना भाइरस विरुद्धको लडाइमा फाइजरको प्याक्सलोभिड ट्याब्लेट निकै उपयोगी हुने विज्ञहरुको दावी छ।

एफडीएकी वैज्ञानिक प्याट्रिजिया काभाजोनीले भनिन्, ‘कोभिडको उपचारका लागि सफलतापूर्वक औषधी तयार गरिएको छ। कोरोनाविरुद्धको विश्वव्यापी लडाइमा यो एउटा ऐतिहासिक कदम हो ।’  अस्पतालमा कोरोनाको उपचार गराइरहेका २,२०० व्यक्तिमा यो ट्याब्लेटको परीक्षण गर्दा अनपेक्षित नतिजा आएको फाइजरका प्रमुख कार्यकारी अधिकृत तथा अध्यक्ष अल्बर्ट बोरुलाले बताए ।

औषधीले मृत्युको जोखिम ८८ प्रतिशतसम्म कम गर्न सक्ने उनको भनाइ छ ।

-एजेन्सी