भारतमा मंकीपक्सको पहिलो केस पुष्टि

भारतमा मंकीपक्सको पहिलो केस पुष्टि भएको छ । संक्रमित व्यक्ति तीन दिनअघि संयुक्त अरब इमिरेट्स (युएई)बाट केरलाको कोल्लम पुगेका थिए । बिहीबार केरलाका स्वास्थ्य मन्त्री वीणा जर्जले बिरामीलाई उच्च ज्वरो र शरीरमा छाला जस्ता लक्षणहरू देखिएपछि उनलाई अस्पतालमा भर्ना गरिएको बताइन्।

हाल उनी खतरामुक्त छन् ।

जर्जले उक्त व्यक्ति विदेशमा मंकीपक्सका बिरामीको सम्पर्कमा रहेको बताए । साथै, बिरामीको सम्पर्कमा आएका अटो चालकलगायत ११ जना यात्रुको पनि परीक्षण गरिने छ । यसअघि पश्चिमबंगालको कलकातामा पनि मंकीपक्सको शंकास्पद केस रिपोर्ट गरिएको थियो। तर, पछि उनको परीक्षण रिपोर्ट नेगेटिभ आएको थियो ।

विश्वमा मंकीपक्सका केसहरू तीव्र गतिमा बढिरहेका छन्। यसैलाई मध्यनजर गर्दै भारत सरकारको केन्द्रीय स्वास्थ्य सचिव राजेश भूषणले सबै राज्यहरू र केन्द्र शासित प्रदेशहरूलाई पत्र लेखेर तिनीहरूलाई मंकीपक्स विरुद्ध सतर्क रहन र स्वास्थ्य मन्त्रालयको दिशानिर्देशहरू पालना गर्न सल्लाह दिएका छन्।