जाडोमा आगो ताप्दा वा विद्युतीय सामग्रीको प्रयोग गर्दा सावधानी अपनाउन आग्रह

हेल्थ आवाज सोमबार, २०८० मंसीर १८ गते, १५:५८ मा प्रकाशित

काठमाडौं– काठमाडौंको आकाश बिहानैदेखि बादलले ढाकिएको छ। बिहानैदेखि उपत्यकामा चिसो महसुससँगै जनजीवन प्रभावित बनेको छ । जाडो बढेसँगै सरकारले आगो ताप्दा, हिटर बाल्दा वा गिजर जस्ता विद्युतीय सामग्रीको प्रयोग गर्दा सावधानी अपनाउन आग्रह गरेको छ ।

जाडोको समयमा शरीर वा कोठालाई न्यानो बनाइराख्न आगो ताप्ने, हिटर बाल्ने, गिजरको प्रयोग गर्ने लगायतका उपायहरू गरिए पनि पर्याप्त सावधानी नअपनाउँदा अप्रिय घटनाहरू हुने गरेका छन् । यसैलाई मध्यनजर गर्दै राष्ट्रिय स्वास्थ्य शिक्षा सूचना तथा सञ्चार केन्द्रले शरीर र कोठालाई न्यानो बनाइराख्न आगो ताप्ने, हिटर बाल्ने, गिजरको प्रयोग गर्ने लगायतका उपाय अपनाउँदा पर्याप्त सावधानी अपनाउन आग्रह गरेको छ ।

सावधानीका निम्न उपायहरू

हावा ओहोरदोहोर हुने ठाउँ वा कोठामा मात्र आगो ताप्ने, हिटर बाल्ने वा गिजर प्रयोग गर्ने गरौँ ।
कोइला जन्य स्रोतबाट सकेसम्म आगो नतापौँ ।
आगो ताप्दा वा हिटर बाल्दा कागज ,कपडा जस्ता छिटो जल्ने खालका सामाग्री नजिकै नराखौँ ।
आगो तापिसकेपछि त्यसलाई पूर्ण रुपमा निभाउने गरौँ ।
हिटरको प्रयोग गर्दा समय–समयमा चलिरहेको हिटरलाई बन्द गर्ने गरौँ ।
सुत्नुअघि अनिवार्य रुपमा हिटर निभाउने गरौँ ।
गिजरको मुख्य मेसिनलाई बाथरुम बाहिर खुला ठाउँमा जडान गरौँ ।
गिजर खोलेर लामो समयसम्म बाथरुममा बस्ने नगरौँ ।