काठमाडौं—स्वास्थ्य तथा खाद्य स्वच्छता मन्त्रालयले दशौं तहका एक जना वरिष्ठ मेडिकल सुपरिटेन्डेन्ट, तीन जना विशेषज्ञ चिकित्सकसहित २३ जना कर्मचारी विरुद्ध कारवाहीको तयारी अगाडि बढाएको छ । बिहीबार मन्त्रालयले ९ जना चिकित्सकसहित २३ जना कर्मचारीलाई सफाइ पेश गर्नका लागि १५ दिने समय दिएर कारवाही प्रक्रिया अगाडि बढाएको हो ।
मन्त्रालयले निकालेको सूचनामा ती कर्मचारीहरु स्वास्थ्य सेवा ऐन, २०५३ मा भएको व्यवस्था विपरित ६० दिनभन्दा बढी कार्यालयमा अनुपस्थित रहेका थिए ।
‘भविष्यमा स्वास्थ्य सेवाको निमित्त अयोग्य नठहरिने गरी सेवाबाट हटाउने विभागीय सजाय किन नगर्ने ? विभागीय सजाय नगर्नुपर्ने कुनै कारण भए यो सूचना प्रकाशित भएको मितिले १५ (पन्ध्र) दिनभित्र आफ्नो सफाइ पेश गर्नुहुन सम्बन्धित कर्मचारीहरुलाई यसै सूचनाद्वारा जानकारी गराइएको छ,’ मन्त्रालयले भनेको छ ।
स्वास्थ्यले विभागीय कारवाहीको तयारी गरेका कर्मचारीहरुमा एक जना दशौं तह, तीन जना नवौं तह र ६ जना आठौं तह, एक जना सातौं तह, चार जना छैटौं तह, ८ जना पाँचौं तहका कर्मचारीहरु छन् ।
