वीरगञ्ज-नारायणी अस्पतालमा चिकित्सकमाथि भएको कुटपिट र अस्पताल परिसरमा भएको तोडफोडको घटनापछि विवाद थप चर्किएको छ । मंगलबार घटना र त्यसपछि उत्पन्न परिस्थितिप्रति असन्तुष्टि जनाउँदै अस्पतालमा कार्यरत ६८ जना चिकित्सकले सामूहिक रूपमा राजीनामा दिएका छन् ।
शनिबार उपचारका क्रममा एक बिरामीको मृत्यु भएपछि आक्रोशित आफन्तले आकस्मिक कक्षमा तोडफोड गर्नुका साथै ड्युटीमा रहेका डा. प्रमोद राममाथि कुटपिट गरेका थिए । चिकित्सकहरूका अनुसार उक्त आक्रमणले अस्पतालभित्रको कार्य वातावरण असुरक्षित बनेको छ ।
घटनाको छानबिन र सुरक्षा व्यवस्थाबारे छलफल गर्न सोमबार जिल्ला प्रशासन कार्यालय पुगेका चिकित्सकमाथि पनि प्रहरीले दुर्व्यवहार गरेको आरोप लगाइएको छ । त्यसपछि उनीहरूले सामूहिक रूपमा पदबाट अलग हुने निर्णय गरेका हुन् ।
अस्पतालका मेडिकल सुपरिटेन्डेन्टलाई बुझाइएको राजीनामापत्रमा चिकित्सकहरूको पेशागत सुरक्षा सुनिश्चित हुन नसकेको र यथास्थितिमा उपचार सेवा दिन सम्भव नभएको उल्लेख गरिएको छ ।
चिकित्सकहरूको सामूहिक राजीनामापछि नारायणी अस्पतालको स्वास्थ्य सेवा प्रभावित हुने देखिएको छ । घटनाको निष्पक्ष छानबिन, दोषीमाथि कानुनी कारबाही तथा स्वास्थ्यकर्मीको सुरक्षा सुनिश्चित गर्न चिकित्सकहरूले सम्बन्धित निकायसँग माग गरेका छन् ।
