स्वास्थ्य बीमा बोर्डद्वारा स्वास्थ्य संस्थालाई १ अर्ब ९६ करोडभन्दा बढी निकासा

काठमाडौं—स्वास्थ्य बीमा बोर्डले ३८३ स्वास्थ्य संस्थालाई १ अर्ब ९६ करोड रुपैयाँभन्दा बढी रकम निकासा दिएको छ । २५ भदौंमा बोर्डले २०८३/०८४ को बजेटबाट ती स्वास्थ्य संस्थालाई १ अर्ब ९६ करोड ७८ लाख ८५ हजार ५४ रुपैयाँ ६० पैसा निकासा दिएको हो ।

उक्त निकासाका लागि बोर्डले २४ भदौंमा निर्णय गरेको थियो । स्वास्थ्य बीमा बोर्डका लेखा उपसचिव पुष्पप्रसाद गुरागाईंकाअनुसार पछिल्लो रकम भुक्तानीसँगै बैशाख २०८३ सम्म स्वास्थ्य बीमाका आएको दावी परेको भुक्तानी भएको हो ।

स्वास्थ्य बीमाको सूचना प्रविधि शाखाबाट पेश भएका स्वीकृत दावी रकम भने २ अर्ब १ करोड ४५ लाख ११ हजार ७४० रुपैयाँ ६३ पैसा थियो ।

जसमध्ये पेश्की बाँकी रहेका संस्थाको रकम २ लाख २ हजार ९१४ रुपैयाँ ६७ पैसा, खाता नं. नभएका संस्थाको २ लाख ४२ हजार ३४२ रुपैयाँ ७१ पैसा, दुई वटा स्वास्थ्य संस्थाको हाल रोक्का राखिएको ५८ लाख ९३ हजार ९३० रुपैयाँ ५४ पैसा कट्टा र भुक्तानी वापत स्वीकृत रकम २ प्रतिशत स्वास्थ्य बीमा कोषमा जम्मा गर्ने गरी उक्त रकम स्वास्थ्य सेवा प्रदायक संस्थालाई भुक्तानी दिइएको हो ।