जुम्ला– सरकारले कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा स्वास्थ्य शिक्षा क्षेत्रको स्नातकोत्तर कक्षा सञ्चालन गर्न अनुमति दिएको छ ।
प्रधानमन्त्री तथा चिकित्सा शिक्षा आयोगका अध्यक्ष केपी शर्मा ओलीको अध्यक्षतामा बसेको बैठकले कर्णाली स्वास्थ्य विज्ञान प्रतिष्ठानमा एमडिजिपी जनरल प्राक्टिस, एमडि एनेस्थेसिया, एमडि पेड्रियाट्रिक्स विधामा पठनपाठन गर्न अनुमति दिएको हो ।
कर्णाली स्वास्थ्य विज्ञान प्रतिष्ठान शिक्षण अस्पतालका शिक्षाध्यक्ष डा. निरेश थापाका अनुसार गत साउन ३० गते भएको निर्णयको प्रधानमन्त्री केपी शर्मा ओलीबाट प्रमाणित भएको जानकारी दिए ।
उनका अनुसार सरकारको यो निर्णयपछि प्रतिष्ठानलाई अर्काे सफलता मिलेको छ । विशेषज्ञ सेवा अध्ययन गरेर कर्णालीले मुलुकलाई अब दक्ष जनशक्ति दिने अवसरका लागि नेपाल सरकार प्रधानमन्त्री, राष्ट्रिय चिकित्सा शिक्षा आयोग, प्रतिष्ठानका पदाधिकारी र शुभचिन्तक सबैको सहयोग र समर्थन रहेको उनले बताए ।
प्रतिष्ठानका अस्पताल निर्देशक डा. मंगल रावलका अनुसार आयोगको पुर्ण बैठकले गरेको निर्णय प्रधानमन्त्रीले प्रमाणित गरेपछि एमडिएमएस पाँच सिटको पक्का भएको छ । अब कर्णालीले एमबीबीएस स्विकृत समेत पाउने बिषयमा आशा पलाएको छ । उक्त विषयमा कर्णाली स्वास्थ्य विज्ञान प्रतिष्ठानलाई पत्र प्राप्त भइसकेको छ ।
यता एक महिना अघिदेखि कर्णाली प्रतिष्ठानमा सो कार्यक्रमहरु सहित एमविविएसका लागि स्विकृत दिन भन्दै प्रतिष्ठानका शिक्षाध्यक्ष डा. निरेश थापा, रजिष्ट्रार विश्वराज काफ्ले, अस्पताल निर्देशक डा. मंगल रावलले चिकित्सा शिक्षा आयोग , स्वास्थ्य मन्त्रालय र प्रधानमन्त्रीको सचिवालयमा दौडधुप गर्दै आएका थिए ।
