जुम्ला—भेरी नगरपालिका–१३ कुदुका ध्रुवप्रसाद शर्मा पेटमा समस्या भएपछि उपचारका लागि जिल्ला अस्पताल खलंगा गए । विशेषज्ञ डाक्टर अस्पतालमा नहुँदा उपचार हुन नसकेपछि उनी फर्केर रुकुमपश्चिमको चौरजहारीमा रहेको मिसन अस्पतालमा गएर उपचार गराए ।
शर्मा त एक प्रतिनिधी पात्र मात्रै हुन् । भेरी नगरपालिका–३ स्थित जाजरकोट जिल्ला अस्पतालमा विशेषज्ञ डाक्टर नहुँदा धेरै बिरामी सेवा अन्यत्र धाउनुपर्ने बाध्यता छ । सानो समस्याका लागि महंगो रकम खर्च गरेर बाहिर जानुपर्ने बाध्यता रहेको शर्माले बताए । जाजरकोट जिल्ला अस्पतालमा विशेषज्ञ डाक्टर नहुँदा बिरामी मर्कामा परेका छन् ।
५० शैय्याको जिल्ला अस्पतालमा कार्यालय प्रमुखसहित सात जना विभिन्न रोगका विशेषज्ञ डाक्टरको दरबन्दी रहेको भएपनि हालसम्म अस्पतालमा एकजना पनि विशेषज्ञ डाक्टर नआएको जिल्ला अस्पतालका प्रमुख नवराज कँडेलले बताए । विशेषज्ञ डाक्टर नहुँदा बिरामीलाई कोहलपुर, नेपालगञ्ज, सुर्खेत वा काठमाडौं गएर उपचार गराउनुपर्ने बाध्यता छ ।
जिल्ला अस्पताललाई ०७२ असोज २२ गते नेपाल सरकारको मन्त्री परिषद्ले ५० शैय्याको सुविधासम्पन्न अस्पताल बनाउने निर्णय गरेको थियो । सोही बमोजिम ५० शैय्याको अस्पतालको भौतिक संरचना निर्माणको काम अन्तिम चरणमा पुगेको भएपनि अस्पतालमा हालसम्म दरबन्दीका डाक्टर छैनन् ।
जिल्ला अस्पतालमा विशेषगरी स्त्रीरोग र बालरोग विशेषज्ञको आवश्यता बढी रहेको अस्पताल स्रोतले जनाएको छ । जिल्ला अस्पतालमा डाक्टरहरू बस्ने आवासलगायतका भौतिक संरचनाको अभावका कारण पनि जिल्लामा विशेषज्ञ डाक्टर आउन नमान्ने समस्याको समेत हल भैसकेको भएपनि विशेषज्ञ डाक्टर आउन नमानेको जिल्ला स्वास्थ्य कार्यालय प्रमुख कँडेलको भनाइ छ ।
नागरिक समाजका अगुवा राजेन्द्रविक्रम शाह विशेषज्ञ डाक्टरलाई कसरी हुन्छ जिल्लामा ल्याउने व्यवस्था गर्नुपर्नेमा जोड दिन्छन् । ‘ राज्यले करोडौं रकम खर्च गरेर भवन निर्माण गर्ने तर विशेषज्ञ चिकित्सकलाई खटाउन नसक्ने पनि हुन्छ ?’ उनले प्रश्न गरे ।
बालरोग, स्त्रीरोग, हाडजोर्नी तथा नसा रोग, रेडियोलोजीलगायत सात जना विशेषज्ञ डाक्टरको दरबन्दी भएतापनि जिल्ला अस्पताल हाल करारमा कार्यरत मेडिकल अधिकृतको भरमा चल्दै आएको अस्पताल प्रमुख कँडेलले बताए ।
विशेषज्ञ डाक्टर जिल्लामा कार्यरत भएमा जिल्लावासीले उपचारका लागि जिल्ला बाहिर जानुपर्ने बाध्यता हट्ने डा. अवसरसिंह राठौर बताए । ‘अहिले प्रदेश सरकारले जनस्वास्थ्य र अस्पताललाई एकै ठाउँमा गाँभेर जिल्ला स्वास्थ्य सेवा कार्यालय बनाएको भएपनि दक्ष जनशक्ति नभएसम्म जनताले सहज र सरल रूपमा सेवा प्राप्त गर्न कठिनाइ छ,’ डा. राठौरले भने ।
