वीरेन्द्रनगर—थारू समुदायमा देखिने सिकलसेल एनिमियाले सुर्खेतमा एक थारु परिवारका तीन पुस्ता थलिएका छन् । सिकलसेल एनिमिया रोगबाट बुवा पुस्ता, छोरा पुस्ता र नाति पुस्ता थलिएपछि आर्थिक, शारीरिक र सामाजिक चिन्ता सुरु भएको छ ।
सुर्खेत वीरेन्द्रनगर–९ का संगीता चौधरी सिकलसेलको बिरामी छन् । उनको परिवारमा तीन जना बिरामी छन् । सबै जनाले औषधी खाइरहेका छन् । यो रोग लागेपछि शारीरिक, आर्थिक, मानसिक तनाव बढेको बढ्यै हुने गरेको उनले बताइन् ।
वीरेन्द्रनगर नगरपालिका–१० का प्रेमबहादुर चौधरीले २०७३ देखि यो रोगको उपचार गराइरहेका छन् । अहिलेसम्म औषधि खाइरहेको उनको भनाइ छ ।
कर्णाली प्रदेशमा सुर्खेतमा मात्र थारू समुदायको बसोबास छ । यहाँ करिब ९ हजार थारू समुदायको जनसङ्ख्या छ । नेपाल संस्कृत विश्वविद्यालयका शरीर रचना विभागका प्राध्यापक एवं थारू समुदायका अगुवा डा. सुरेन्द्र चौधरीले सुर्खेतमा २०८० सालमा ७० जना र २०८१ मा १८ जना सिकलसेलका बिरामी पत्ता लागेको बताए ।
उनले अझै पनि पर्याप्त मात्रामा परीक्षण नभएकाले सङ्ख्या कम देखिएको भन्दै यदि परीक्षणको दायरा बढाउने हो भने बिरामी फेला पर्ने क्रम पनि बढ्ने जानकारी दिए । उनले यो सरुवा रोग नभएको जानकारी दिँदै बिरामी आमा बाबुबाट जन्मिने सन्तान पनि बिरामी नै हुने उल्लेख गरे ।
सिकलसेल सामुदायिक अस्पताल तथा अनुसन्धान केन्द्र सुर्खेतका अध्यक्ष दिलबहादुर चौधरीले सिकलसेल एनिमियाबाट थारू समुदायको पुस्ता नै प्रभावित हुन थालेको बताए । उनले यस रोगलाई सरोकारवाला पक्षले सामान्य रूपमा लिँदा बढ्दै गएकोले संवेदनशील बनिदिन आग्रह गरे । उनले विपन्न थारू समुदायलाई लाग्ने यो रोगको सहज उपचारका लागि सुर्खेतमै व्यवस्था गरिनुपर्ने, औषधी पनि सुर्खेतबाटै उपलब्ध गराउनुपर्ने, यस रोगका बिरामीलाई परिचयपत्र र मासिक भत्ताको व्यवस्था गर्न सके उपचारमा सहज हुने बताए । अहिले यस रोगको उपचार गर्न र औषधी लिन नेपालगन्ज जानुपर्ने बाध्यता छ ।
