जुम्ला—हुम्लाको सामुदायिक स्वास्थ्य इकाई खोल्सीमा स्वास्थ्यकर्मी नहुँदा गर्भवती महिलाहरू घरमै सुत्केरी हुन बाध्य भएका छन् । १५ पुसदेखि स्वास्थ्य संस्थामा नर्सिङ स्टाफ नहुँदा यस्तो समस्या उत्पन्न भएको हो ।
सामुदायिक स्वास्थ्य इकाई खोल्सीमा कार्यरत अनमी सपना बुढाले पुस महिनामा जागिर छोडेपछि बर्थिङ सेन्टरमा सेवा प्रभावित भएको हो । त्यसयता सुत्केरी गराउन आउने सेवाग्राहीहरूले सास्ती भोग्नुपरेको स्थानीयहरूको गुनासो छ ।
१५ चैतमा बिहान सुत्केरी व्यथा लागेर स्वास्थ्य संस्थामा पुगेकी जानु शाही स्वास्थ्यकर्मी नहुँदा अन्ततः घर फर्केर सुत्केरी हुनु परेको उनका पति हाँसबहादुर शाहीले बताए । ‘होम डेलिभरी जोखिमपूर्ण हुने भएकाले स्वास्थ्य संस्थामा लग्यौं । तर, अनमी नभेटिएपछि घरमै फर्केर सुत्केरी गराउनु प¥यो,’ उनले भने ।
त्यस्तै, सोही दिन सुत्केरी व्यथा लागेकी अर्की गर्भवती भाइबोला सिंहलाई पनि स्वास्थ्य संस्थामा लगिए पनि नर्सिङ स्टाफ नभएकै कारण घर फर्कनु परेको उनका पति वृष सिंहले गुनासो गरेका छन् । यसले स्थानीयलाई ज्यानको जोखिम मोल्न बाध्य बनाएको उनहरूको भनाइ छ ।
स्वास्थ्य इकाईका इन्चार्ज धिरिन शाहीका अनुसार अनमी बुढा जागिर छोडेर गएपछि पटक–पटक सिमकोट गाउँपालिकासँग नर्सिङ स्टाफको व्यवस्था गर्न अनुरोध गरिएपनि कुनै सुनुवाई भएको छैन । करिब चार महिना बितिसक्दा पनि स्टाफको व्यवस्था नहुनु गाउँपालिकाको लापरवाही भएको उनको भनाइ छ ।
सिमकोट गाउँपालिका—८ का वडाध्यक्ष कमल बुढाले पनि गाउँ कार्यपालिकाको बैठकमा पटक–पटक यो विषय उठाए पनि समाधान नभएको बताए । स्वास्थ्य जस्तो संवेदनशील क्षेत्रमा लापरवाही हुनु गैरजिम्मेवारी भएको उनको भनाइ छ ।
गाउँपालिकाका स्वास्थ्य शाखा संयोजक नरबहादुर भण्डारीले गत तीन महिनादेखि नर्सिङ स्टाफ अभाव रहेको स्वीकार गर्दै समाधानका लागि पहल भइरहेको बताए । केही प्राविधिक कारणले ढिलाइ भएको भन्दै उनले छिट्टै नर्सिङ स्टाफ व्यवस्था गर्ने प्रतिबद्धता जनाए ।
