स्यानिटाइजर दर्ता तीन महिना थप्ने सरकारको निर्णयमा औषधी उत्पादक संघको विरोध

काठमाडौं—नेपाल सरकारले सेनिटाइजर दर्ता अनुमति दिने समयावधि थप गरेपछि नेपाल औषधी उत्पादक संघले विरोध जनाएको छ । संघको बिहीबार बसेको आकस्मिक बैठकले सरकारले गरेको निर्णय तीन दिनभित्र सच्चाउन चेतावनी समेत दिएको छ ।

स्वास्थ्य तथा जनसंख्या मन्त्रालयले गत २२ असारमा मन्त्रिस्तरीय निर्णय गरी स्यानिटाइजरहरुको दर्ता अनुमतिका लागि तीन महिना थप गर्ने निर्णय गरेको थियो । संघले उक्त निर्णयमा असहमति जनाउँदैं तत्काल निर्णय फिर्ता लिन औषधी व्यवस्था विभागमार्फत मन्त्रालयलाई पत्राचार गरेको जनाएको छ ।

गत ९ चैतमा औषधी व्यवस्था विभागले सूचना प्रकाशित गरी स्यानिटाइजरलाई दर्ताको प्रक्रियामा आउने तीन महिनाको समय दिएको थियो । सो समयमा ४० वटा उद्योगका १ सय २० वटा स्यानिटाइजर दर्ता भएको संघको दावी छ । कोरोना संक्रमणको विशेष परिस्थितीमा स्यानिटाइजरको अत्याधिक प्रयोग भएको, बिना मापदण्ड र बिना गुणस्तर दर्ता नभइ बसेका त्यस्ता स्यानिटाइजर उत्पादकलाई विभागले संरक्षण गरेको आरोप लगाउँदैं औषधी उत्पादक संघले म्याद थपको विरोध गरेको हो ।

संघले मिथानोल मिसाएको स्यानिटाइजर समेत बिक्री भएको भन्दैं अझ तीन महिना दर्ताका लागि समय दिनुले नेपाल सरकार स्वास्थ्य प्रति संवेदनशील नभएको आरोप लगाएको छ ।