काठमाडौं—स्वास्थ्य तथा जनसंख्या मन्त्रालयले अक्सिजन व्यवस्थापनलाई प्रभावकारी बनाउन काम अगाडि बढाएको छ । त्यसका लागि अक्सिजन सिलिण्डर भरेर बिग्रिएका प्लान्टहरु बनाउन निर्देशन दिएको छ ।
मन्त्रालयको गुणस्तर मापदण्ड महाशाखा प्रमुख डा. मदन उपाध्यायकाअनुसार अक्सिजन कलेक्सन गरेर राख्ने, प्लान्ट र लिक्वीइड टंयाक बिग्रिएको छ भने बनाउने, खरिद बाँकी वा प्रक्रियामा भए चाँडो पूरा गर्न समेत निर्देशन दिइएको छ ।
‘आकस्मिक प्रयोगका लागि सबै प्रदेशमा १ हजार अक्सिजन सिलिण्डर र स्वास्थ्य सेवा विभागले २ हजार सिलिण्डर भरेर राख्न भनेका छौं,’ डा. उपाध्यायले भने, ‘सम्भावित तेस्रो वेवको तयारीमा रहन सबै अस्पताललाई निर्देशन दिइएको छ ।’
कोभिड-१९ को दोस्रो लहरमा अक्सिजनको व्यवस्थापन असहज भएका कारण संक्रमितको उपचारमा समस्या भएको थियो । जसका कारण मन्त्रालयले सम्भावित तेस्रो वेवका लागि अहिले नै विभिन्न तयारीहरु अगाडि बढाइरहेको छ ।
मन्त्रालयले अहिलेकै स्थिर अवस्था रहे आगामी ५ महिनामा १ लाख ९३ हजार ८ सय ५६ जना नयाँ संक्रमित थपिने प्रक्षेपण गरेको छ । नयाँ थपिनेसंक्रमितमध्ये ३८ हजार ७ सय ७१ जना संक्रमितलाई अस्पताल भर्ना गरी उपचार गर्नुपर्ने र सोमध्ये ९ हजार ७ सय ९३ लाई सघन उपचार गर्नुपर्ने आँकलन मन्त्रालयले गरेको छ ।
