काठमाडौं—नेपाल पेडियाट्रिक सोसाइटीले कोभिड—१९ को नयाँ भेरियन्ट ओमिक्रोनसहितका भेरियन्ट जोखिम बढिरहेको भन्दैं बालबालिकालाई उपयुक्त र सुरक्षित खोप उपलब्ध गराउन माग गरेको छ । ६ पुसमा सोसाइटीका महासचिव डा. कृष्णप्रसाद पौडेलले एक विज्ञप्ती जारी गर्दै १२ वर्षमुनिका बालबालिकालाई उपयुक्त र सुरक्षित खोप उपलब्ध गराउन माग गरेका हुन् ।
ओमिक्रोनसहितका भेरियन्टको संक्रमणको जोखिमकैबीच स्कुलहरु चलिरहेको र बालबालिकामा समेत संक्रमण जोखिम देखिइरहेको भन्दैं सोसाइटीले आफ्नो ध्यानाकर्षण भएको समेत जनाएको छ । सोसाइटीको ६ पुसमा बसेको केन्द्रीय कार्यसमितिको बैठकले पनि समयमै बालबालिकालाई खोप उपलब्ध गराउन भनेको छ ।
उसले अमेरिका, चीन, फ्रान्स, इटालीलगायतका युरोपेली मुलुकहरुमा बालबालिकालाई खोप दिन सुरु गरिसकेको र अमेरिकी फुड एण्ड ड्रग एडमिनिष्ट्रेशनले समेत केही खोपहरु सिफारिस गरेकाले बालिबालिकालाई खोप दिने व्यवस्था गर्न सरकारसँग माग गरेको छ ।
अन्तर्राष्ट्रिय पेडियाट्रिक एशोसिएसनले विज्ञप्ति निकालेर ५ वर्षमाथिका बालबालिकालाई परीक्षण भएका खोपहरु तत्काल दिन अन्तर्राष्ट्रिय समुदायलाई आग्रह गरेको छ ।
