काठमाडौं—प्रधानमन्त्री शेरबहादुर देउवाले स्वास्थ्य तथा जनसंख्या मन्त्री विरोध खतिवडालाई मन्त्रालयका प्रमुख विशेषज्ञ डा. गुणराज लोहनीको वीर अस्पतालको प्रमुख प्रशासकीय अधिकारीमा गरिएको सरुवा रोक्न निर्देशन दिएका छन् । कांग्रेसनिकट चिकित्सक र स्वास्थ्यकर्मीहरुको दबाबपछि प्रधानमन्त्री देउवाले डा.लोहनीको सरुवा स्थगित गर्न निर्देशन दिएका हुन् ।
प्रधानमन्त्रीको निर्देशनपछि सम्भवतः अब डा. लोहनीको सरुवा रोकिनेछ । तर, हेल्थआवाजले यो समाचार तयार पार्दासम्म स्वास्थ्यमन्त्री खतिवडाले यसबारेमा निर्णय गरिसकेका छैनन् । यसअघि उनले वीर अस्पतालको नयाँ संगठन संरचनाअनुसार डा. लोहनीलाई वीरको प्रमुख प्रशासकीय अधिकारीमा सरुवा गरेका थिए ।
तर, अहिले वीरको निमित्त प्रशासकीय अधिकारी रहेका डा. भुपेन्द्र बस्नेतलगायतका कांग्रेस निकट चिकित्सकहरुले उक्त निर्णय परिवर्तन गर्न प्रधानमन्त्री देउवालाई दबाब दिएका थिए । साथै, वीर अस्पतालका केही कर्मचारी समेत डा. लोहनीको सरुवा रोक्नका लागि आन्दोलनमा उत्रेका थिए ।
वीरको नयाँ संगठन संरचनाअनुसार प्रमुख प्रशासकीय अधिकारी १२ औं तहको प्रमुख विशेषज्ञ हुने व्यवस्था छ ।
