काठमाडौं—कोभिड–१९ नियन्त्रणमा सबैभन्दा प्रभावकारी काम गर्ने देश हो—न्युजिल्याण्ड । कोभिड महामारीका कारण विश्वका शक्ति राष्ट्रहरु भयावह त्रासदीबाट ग्रुजिरहँदा न्युजिल्याण्डमा भने अहिलेसम्म १४ हजार ५ सय ७२ जनामात्रै संक्रमित भएका छन् । संसारमै न्युजिल्याण्डको कोभिड–१९ नियन्त्रण, उपचार र व्यवस्थापन निकै व्यवस्थित मानिएको छ ।
त्यही देशको कोभिड–१९ सम्बन्धि काम गर्ने उच्च तहमा एक जना नेपाली विज्ञ नियुक्त भएका छन् । न्युजिल्याण्डको स्वास्थ्य मन्त्रालयअन्तर्गतको ‘कोभिड रेस्पोन्स टिम’को प्रिन्सिपल एडभाइजरज जस्तो उच्च तहमा नेपाली मूलका डा. रमिल अधिकारी नियुक्त भएका छन् । जनस्वास्थ्य व्यवस्थापनको अब्बल ज्ञान, जनस्वास्थ्य रणनीतिबारे जानकार र उच्च तहको अनुभव भएकालाई यो पद नियुक्त गरिन्छ ।
एक दशकअघि न्युजिल्याण्ड पुगेका डा. अधिकारी २७ डिसेम्बरमा उक्त पदमा नियुक्त भएका हुन् । ‘चिफ डाइरेक्टरले नियुक्त गर्नुभएको हो,’ हालै एक अनलाइन कुराकानीमा उनले हेल्थआवाजसँग भने, ‘म यहाँ आएको एक दशक भैसक्यो । अधिकांश समय जनस्वास्थ्यमा काम गरे ।’ उनले आफूले महामारीमा पनि प्रत्यक्ष÷अप्रत्यक्ष रुपमा निभाइरहेको भूमिकाका कारण पनि आफूलाई नियुक्त गरिएको हुन सक्ने बताए ।
विदेशमा यो सफलता औलामा गन्न सकिने नेपालीलाई मात्र प्राप्त हुन्छ । ‘विदेशमा आएर यस्तो महामारीको परिस्थितीमा यहाँ पुग्ने नेपाली औला मै गन्न सकिन्छ,’ उनले भने, ‘यो पदमा नियुक्त भएपछि पूरा गर्ने दायित्व र काम धेरै छन् । पहिलादेखि नै विभिन्न सामाजिक संस्थामा लागेको र चिकित्सक भएर पब्लिक हेल्थ र अनुसन्धानमा काम गरिरहेकाले कारण मलाई यहाँसम्म आइपुग्न धेरै सहयोग पुग्यो ।’
न्युजिल्याण्ड सरकारको उच्च तहको पद मानिने यसमा एक जना मात्रै हुने उनले जानकारी दिए । ‘यो पदमा रहेर मैले सरकारलाई मद्दत गर्ने हो । महामारीले प्रभावित पारेको अवस्थालाई हेर्ने र अब कसरी बढ्न सकिन्छ भनेर एउटा नीति बनाएर सरकारलाई दिने हो,’ डा. अधिकारीले प्रिन्सिपल एडभाइजर पदमा नियुक्त भएपछिको आफ्नो भूमिकाबारे सुनाए । उनले न्युजिल्याण्ड कोभिड–१९ महामारी नियन्त्रणबाट नेपालले धेरै कुरा सिक्नुपर्ने बताए । ‘मुख्य कुरा त सरकारले बनाएको नियमलाई समर्थन गर्नुपर्छ,’ उनले भने, ‘लागु गरिएका नियमलाई सबैले मान्नुपर्ने देखिन्छ ।’ यसले कोभिड–१९ नियन्त्रणमा प्रमुख भूमिका खेल्नु उनले बताए ।
नेपाल सरकारको पर्यटन प्रवद्र्धन दूत समेत रहेका डा. अधिकारी पब्लिक हेल्थ एशोसिएसन न्युजिल्याण्ड वेलिङटनको अध्यक्ष तथा मेसी विश्वविद्यालयको अनुसन्धान पनि सक्रिय छन् । त्यसबाहेक उनी धेरै संघसंस्थामा आवद्ध छन् । कास्कीमा जन्मिएका डा. अधिकारीले पोखराको डायमण्ड इंग्लिस बोर्डिङ स्कुलबाट एसएलसी पास गरेका थिए । उनले अन्नपूर्ण क्याम्पस पोखराबाट आइएस्सी उत्तीर्ण गरे । उनले चीनबाट एमबीबीएस अध्ययन गरेका हुन् । उनले मेसी युनिभर्सिटीमाबाट पब्लिक हेल्थमा पोष्ट ग्राजुयसन गरेका छन् ।
