काठमाडौं—कोभिड—१९ समुदायस्तरमा फैलदासमेत राज्य संवेदनशील नभएको भन्दै नेकपा एमाले निकट राष्ट्रिय स्वास्थ्यकर्मी संघ नेपालले ७७ वटै जिल्लाबाट प्रधानमन्त्री शेरबहादुर देउवालाई ज्ञापनपत्र बुझाएको छ । संघले १५ वटा बुँदामा मागहरु विभिन्न मागहरु राख्दैं प्रमुख जिल्ला अधिकारीमार्फत जिल्लामा र स्वास्थ्य तथा जनसंख्यामन्त्रीमार्फत केन्द्रमा ज्ञापनपत्र बुझाएको हो ।
संघका अध्यक्ष रामबहादुर चन्दकाअनुसार ज्ञापनपत्र प्रधानमन्त्री, स्वास्थ्यमन्त्री र प्रदेश मुख्यमन्त्रीहरुलाई बुझाइने कार्यक्रम रहेको छ । ज्ञापनपत्रमा संक्रमित स्वास्थ्यकर्मीहरुको निःशुल्क औषधी उपचारको व्यवस्था गर्नुपर्ने, फ्रन्टलाइनमा खटिएका स्वास्थ्यकर्मी र कर्मचारीको यथाशीघ्र विमा गरिनुपर्ने, यसअघि स्वास्थ्यकर्मीले पाउने जोखिम भत्ता तुरुन्त पाउनुपर्ने उल्लेख छ ।
यसैगरी, महामारी र नियमित स्वास्थ्य उपचारका लागि अति आवश्यक औषधीको अभाव र कालोबजारी तत्काल नियन्त्रण गर्नुपर्ने, संघ र प्रदेशबाट हुने कर्मचारी समायोजन सरुवा बढुवा, स्तरवृद्धिलगायतका नियमित कार्यहरु हुने अन्यायपूर्ण र अपादर्शी कार्य बन्द गर्नुपर्ने, करारमा नियुक्ति भएर निरन्तर काम गरिरहेका सम्पूर्ण स्वास्थ्यकर्मीको म्याद थप गर्नुपर्नेलगायतका १५ बुँदा छन् ।
