७१ जिल्ला र ६४४ स्थानीय तहले दिए खोप विवरण, बाँकीलाई छिटो बुझाउन मन्त्रालयको निर्देशन

काठमाडौँ – स्वास्थ्य तथा जनसंख्या मन्त्रालयले खोपको मौज्दात र खोप लगाएकाहरुको विवरण पठाउन बाँकी रहेका ६ जिल्ला र १०९ स्थानीय तहलाई निर्देशन दिएको छ। सोमबार सूचना जारी गर्दै मन्त्रालयले छिटोभन्दा छिटो खोपको विवरण पठाउन निर्देशन दिएको हो।

सूचना प्रकाशित भएबमोजिम कोभिड-१९ विरुद्ध खोप अभिलेख राख्नको निमित्तमा २१ माघसम्म विवरण प्रविष्ट गर्ने सातै प्रदेश, ७१ जिल्ला तथा ६४४ स्थानीय तहहरुलाई मन्त्रालयले आभार व्यक्त गरेको छ।

यसको  साथै खोपको अभिलेख छानविन प्रक्रिया सम्पन्न गर्नका लागि प्रयोगमा आउन सक्ने खोप, म्याद गुज्रिएको वा कुनै कारणवश क्षति भै प्रयोग गर्न नमिल्ने खोपको मात्राको विवरण पनि २६ माघभित्र डीएचएस प्रणालीमा प्रविष्ट गर्न सबै स्वास्थ्य कार्यालय, स्थानीय तहलाई मन्त्रालयले अनुरोध गरेको छ।