२०८१ साउन २, बुधबार
Health Aawaj logo
गृहपृष्ठसमाचारस्वास्थ्यमन्त्रीको ‘खोप किनेर लगाएको’ अभिव्यक्ति विवादमा, एमालेद्वारा खोप रेकर्डसहित राजीनामा माग

स्वास्थ्यमन्त्रीको ‘खोप किनेर लगाएको’ अभिव्यक्ति विवादमा, एमालेद्वारा खोप रेकर्डसहित राजीनामा माग


काठमाडौं—प्रमुख प्रतिपक्षी दल नेकपा एमाले कोभिड—१९ विरुद्धको २४ लाख खोप हराएको भन्दैं स्वास्थ्य तथा जनसंख्यामन्त्री विरोध खतिवडाको विरोध गरिरहेको छ । मन्त्री खतिवडाले भने खोप नहराएको केही खोपको विवरण प्राप्त हुन बाँकी रहेको एवं केही खोप वेस्टेज भएको प्रष्टीकरण दिइरहेका छन् ।

आरोप—प्रत्यारोप श्रृखला चलिरहेका बेला मन्त्री खतिवडाले सगरमाथा टेलिभिजनको अन्तर्वार्तामा खोप नहराएको बरु आफूले केपी शर्मा ओली प्रधानमन्त्री हुँदा पाँच हजार रुपैयाँ खोप किनेर लगाएको भनेर अभिव्यक्ति दिएका थिए । ‘मैले लगाएको छु पाँच हजारमा खोप,’ टेलिभिजनसँग उनले भनेका छन्, ‘सरकारले ल्याएको खोप मैले ५ हजारमा लगाएको छु ।’

स्वास्थ्यमन्त्री खतिवडाको उक्त अभिव्यक्तिपछि नेकपा एमालेका सचिव एवं स्वास्थ्य तथा जनसंख्या विभाग प्रमुख योगेश भट्टराईले मन्त्री खतिवडाको उक्त भनाइ झुटो र अफवाहपूर्ण भएको बताएका छन् । उनले मंगलबार एक विज्ञप्ति जारी गर्दै बानेश्वरको सिभिल अस्पतालमा मन्त्री खतिवडाले कोभिड—१९ विरुद्धको भ्याक्सिनको पहिलो डोज लगाएको बताएका छन् ।

‘खोप किनेर लगाएको भन्ने स्वास्थ्यमन्त्री खतिवडाको उक्त भनाइ सरासर झुटो र अफवाहपूर्ण छ,’ भट्टराईले विज्ञप्तिमा भनेका छन्, ‘सिभिल अस्पताल, बानेश्वरमा उहाँले पहिलो मात्रा खोप २०७७ फागुन १९ गते लगाएको अभिलेख सुरक्षित छ । उनले तत्कालीन सरकारले २०७७ फागुन १९ गतेदेखि २१ गतेसम्म संघीय संसदका सदस्यहरुलाई सिभिल अस्पतालमा निःशुल्क खोप उपलब्ध गराएका बेला सिभिल अस्पतालको रजिष्टर ख मा क्र.सं. ४८ मा दर्ता गरेर खोप लगाएको उल्लेख गरेका छन् ।

भट्टराईको विज्ञप्तिमा ६२ वर्षीय खतिवडाले ब्याच नं. 4120 Z 004 को कोभिशिल्ड खोप लगाएको उल्लेख छ । उनले पूर्ववर्ती सरकारलाई बदनाम गर्न खतिवडाले गतल सूचना दिएको समेत आरोप लगाएका छन् । एमालेले स्वास्थ्य मन्त्री खतिवडाको गैरजिम्मेवार अभिव्यक्ति र व्यवहारप्रति संवेदनशील हुँदैं मन्त्री पदबाट बर्खास्त गर्न प्रधानमन्त्रीको समेत ध्यानाकर्षण गराएको छ ।


क्याटेगोरी : समाचार



तपाईको प्रतिक्रिया दिनुहोस


ट्रेण्डिङ