डा. हेल्थकेयर फार्मेसीका सञ्चालक २६ वर्षीय लामा पक्राउ

काठमाडौं—महानगरीय अपराध महाशाखाले नियन्त्रित औषधिसहित फार्मेसी सञ्चालक उदय थिङ (कविर लामा) लाई पक्राउ गरेको छ । आइतबार नरेफाँटबाट सोही ठाउँमा रहेको डा. हेल्थकेयर फार्मेसीका सञ्चालक २६ वर्षीय थिङलाई नियन्त्रित औषधिसहित पक्राउ गरेको महाशाखाका प्रवक्ता कृष्णप्रसाद कोइरालाले जानकारी दिए ।

कविर लामा भनेर चिनिने थिङले ट्रमाडोल र ट्रमाडेक्स नामक नियन्त्रित औषधि उपत्यकाका विभिन्न ठाउँमा लुकाई छिपाई बिक्री गरेको सूचनाका आधारमा प्रहरीले पक्राउ गरेको जनाएको छ ।

मकवानपुरको हेटौडा—१६ स्थायी ठेगाना भएका थिङबाट ट्रमाडोल हाइड्रोक्लोरोसाइड क्याप्सुल ५० एमजीको ४२ हजार ५ सय थान र ट्रमाडेक्स हाइड्रोक्लोरोसाइड क्याप्सुल ५० एमजीको १० हजार थान प्रहरीले बराबद गरेको छ ।

थिङलाई थप अनुसन्धान र कारवाहीका लागि औषधी व्यवस्था विभागलाई बुझाइएको प्रवक्ता कोइरालाले जानकारी दिए ।