काठमाडौं—हेटौडास्थित मदन भण्डारी स्वास्थ्य विज्ञान प्रतिष्ठानका उपकुलपति प्रा.डा. विश्वराज जोशी निलम्बित भएका छन् । बागमती प्रदेशका मुख्यमन्त्रीसमेत रहेका प्रतिष्ठानका कुलपति राजेन्द्र पाण्डेले डा. जोशीले पदीय दायित्व निर्वाह नगरेको निलम्बन गरेका हुन् ।
प्रतिष्ठानका ५ जना सिनेट सदस्यले डा. जोशी विरुद्ध पदीय दायित्व निर्वाह नगरेको भन्दैं मुख्यमन्त्री कार्यलयमा निवेदन हालेका थिए ।
‘उहाँ (जोशी) विरुद्ध प्रतिष्ठान ऐनअनुसार पदीय दायित्व निर्वाह नगरेको भनेर उजुरी परेको हुँदा छानविन कमिटी बनाएको छु,’ मुख्यमन्त्री पाण्डेले हेल्थआवाजसँग भने, ‘ऐनअनुसार छानविन सुरु भएपछि उपकुलपति स्वतः निलम्बित हुने व्यवस्था छ । छानविन कमिटीले ल्याएको रिपोर्ट हेरेर आरोप पुष्टि भए पद जान्छ । पुष्टि नभए पुर्नबहाली हुनुहुनेछ ।’
उपकुलपति माथि लागेका आरोपबारे अध्ययन गर्न मुख्यमन्त्री पाण्डेले मुख्यमन्त्री कार्यलयका सचिव यमलाल भुसालको संयोजकत्वमा छानविन समिति गठन गरेका छन् ।
प्रा.डा. जोशीलाई बागमती प्रदेशका यसअघिका मुख्यमन्त्री डोरमणि पौडेलले २०७७ साल साउन १६ गते ४ वर्षे कार्यकालका लागि नियुक्त गरेका थिए ।
मुख्यमन्त्री पाण्डेले ऐनअनुसार उपकुलपति निलम्बन भएपछि स्वतः शिक्षाध्यक्ष (दोस्रो बरियता) निमित्त उपकुलपति हुने बताए । ‘उपकुलपति निलम्बन भएपछि स्वतः दोस्रो बरियतामा भएको व्यक्ति निमित्त हुन्छ,’ उनले भने, ‘आर्थिक अधिकारी क्याबिनेटले प्रत्योजन गर्नेछ ।’