काठमाडौं—कोटेश्वरस्थित गौतम वुद्ध अस्पतालका प्रबन्ध निर्देशक भुवन श्रेष्ठले आगामी प्रतिनिधीसभा निर्वाचनमा काठमाडौं २ बाट चुनाव लड्ने घोषणा गरेका छन् । काठमाडौं—२ पूर्व प्रधानमन्त्री तथा एकीकृत समाजवादीका अध्यक्ष माधवकुमार नेपालको निर्वाचन क्षेत्र हो ।
नेपाल काठमाडौंबाहेक गृहजिल्ला रौतहटबाट पनि चुनाव लड्दैं आएका छन् । यसपटक उनी गृहजिल्ला छाडेर काठमाडौं—२ बाटै चुनाव लडेमा नेपालसँग श्रेष्ठको प्रतिस्पर्धा हुने निश्चित छ ।
३१ वर्षीय श्रेष्ठले कमर्समा स्नातक गरेका छन् । सर्लाही स्थायी घर भएका उनी हाल काठमाडौंमा बस्दैं आएका छन् । ‘बसोबास यही छ,’ उनले भने, ‘प्रतिनिधीसभा सदस्यमा जहाँबाट पनि लड्न पाइने भएकाले काठमाडौं २ रोजेको हुँ ।’ उनले समाज रुपान्तरणका लागि युवापुस्ताको भूमिका आवश्यक भएकाले आफूले उम्मेदवारी घोषणा गरेको उल्लेख गरे ।
श्रेष्ठसँग मेडिकल सेक्टर काम गरेको झण्डै १२ वर्षको अनुभव छ । उनले सर्वांग, मेगा, गणेशमान, करुणा र समिट हस्पिटलमा काम गरिसकेका छन् । श्रेष्ठ कोभिड—१९ का बेला फ्रन्टलाइनमा रहेर बिरामीको सेवामा सक्रिय रहेका थिए ।