नर्समाथि कुटपिट गर्नेलाई कारवाही गर्न गोनानको माग

काठमाडौँ – सरकारी सेवामा आवद्ध नर्सहरुको संघ नेपाल (गोनान)ले तनहुँमा नर्समाथि कुटपिट भएको घटनाको सत्यतथ्य छानविन गर्न माग गरेको छ। संघले एक विज्ञप्ति जारी गर्दै घटनाको छानविन गरी दोषीलाई आवश्यक कारवाहीको माग गरेको हो।।

दिनरात नभनि काम गर्ने राष्ट्रसेवकमाथि भएको सांघातिक घटनाले समग्र स्वास्थ्यकर्मीहरुको मनोबल गिर्ने र सेवामा समेत प्रभाव पर्ने संघले जनाएको छ।

संघले सरकारलाई ध्यानाकर्षण गराउदै विज्ञप्तिमा भनेको छ, ‘स्वास्थ्यकर्मी तथा स्वस्थ्य संस्था सुरक्षा सम्बन्धी पहिलो संशोधन अध्यादेश २०७८ को दफा ३ अनुसार घटनाको सत्यतथ्य छानबिन गरी दोषीउपर कारवाहीको माग गर्दै, घाइते नर्सको उपचारमा सहयोग गर्न पनि अपिल गरिन्छ।’

२५ जेठमा तनहुँको व्यास नगरपालिका–९ गजुरे स्वास्थ्य चौकीमा कार्यरत अनमी प्रजापति कुमालमाथि कुटपिट भएको थियो । प्रसूति सेवामा ड्युटीमा खटिरहेको बेला उनीमाथि कुटपिट भएको थियो। घाइते नर्सको पश्चिमाञ्चल क्षेत्रीय अस्पताल पोखरा उपचार भइरहेको छ।