५ देखि ११ वर्षका बालबालिकालाई दिइने २२ लाख डोज फाइजर खोप काठमाडौंमा

काठमाडौं—५ वर्षदेखि ११ वर्षसम्मका बालबालिकालाई दिइने कोभिड—१९ विरुद्धको २२ लाख डोज फाइजर खोप काठमाडौं आइपुगेको छ । आइतबार दिउँसो अमेरिकाले कोभ्याक्स सुविधामार्फत उपलब्ध गराएको २२ लाख ३ हजार २ सय डोज फाइजर खोप काठमाडौं आइपुगेको हो ।

स्वास्थ्य सेवा विभागको खोप शाखाका वरिष्ठ फार्मेसी अधिकृत बडेबाबु थापाले भने, ‘आइतबार दिउँसो खोप त्रिभुवन विमानस्थलमा आइपुगेको छ । खोप अभियान चाडै सुरु गरिने भएकाले आजै प्रदेशका खोप भण्डार केन्द्रमा आवश्यक खोप पठाउँछौं ।’

सरकारले ९ देखि १५ असारसम्म पहिलो चरणमा ५ देखि ११ वर्षसम्मका १९ लाख बालबालिकालाई खोप दिने तयारी गरेको छ । पहिलो चरणमा २७ जिल्लाका बालबालिकालाई खोप दिइनेछ । उनीहरुलाई २ देखि ८ साउनसम्म दोस्रो डोज खोप दिइनेछ ।

बाँकी ५० जिल्लाका बालबालिकालाई भने ५ देखि ११ भदौमा पहिलो डोज र २७ भदौदेखि १ असोजसम्म दोस्रो डोज खोप दिइनेछ । दोस्रो चरणमा १० लाख बालबालिकाले खोप पाउनेछन् । ५ वर्षमाथि र ११ वर्षमुनिका २९ लाख बालबालिकालाई खोप दिइनेछ ।