भारतको गणतन्त्र दिवसमा नेपाललाई ७५ एम्बुलेन्स उपहार

काठमाडौँ- भारतको ७५ औं गणतन्त्र दिवसको अवसरमा नेपाललाई ७५ एम्बुलेन्स सहयोग गरेको छ। आइतबार भारतीय दुतावासले नेपाल-भारत मैत्री विकास साझेदारी कार्यक्रमअन्तर्गत विभिन्न जिल्लामा फैलिएका स्वास्थ्य र शिक्षाको क्षेत्रमा काम गर्ने सरकारी तथा गैरसरकारी संस्थाहरूलाई ७५ वटा एम्बुलेन्स तथा स्कुल बसहरु उपहार स्वरुप प्रदान गरेको हो ।

दूतावासमा आयोजित कार्यक्रममा नेपालका लागि नवनियुक्त भारतीय राजदूत नवीन श्रीवास्तवले एम्बुलेन्स तथा बसको साँचो हस्तान्तरण उपहार शिक्षा, विज्ञान तथा प्रविधि मन्त्रालयका मन्त्री देवेन्द्र पौडेललाई हस्तान्तरण गरेका थिए । हस्तान्तरण कार्यक्रममा बोल्दै राजदूत श्रीवास्तवले यस्ता किसिमका अनुदानले नेपाल सरकारको स्वास्थ्य तथा शिक्षा क्षेत्रहरु एवम् र पूर्वाधारको सुदृढीकरणको प्रयासलाई बलियो बनाउने बताए ।

त्यस्तै, उपहार बुझ्दै मन्त्री पौडेलले भारत सरकारको नेपालमा चलिरहेका विभिन्न विकास परियोजनाहरूको प्रशंसा गर्दै यस्ता सहयोगले दुई देशबीचको द्विपक्षीय सम्बन्धलाई सुदृढलाई बढावा दिने उल्लेख गरे ।