स्वास्थ्य सेवा सर्वसुलभ ढंगबाट जनताले पाउने व्यवस्था गर्न लाग्नेछु : डा. राउत

राजविराज—सप्तरी २ बाट प्रतिनिधीसभामा नवनिर्वाचित डा. चन्द्रकान्त (सिके) राउतले स्वास्थ्य सेवा सर्वसुलभ ढंगबाट जनताले पाउने व्यवस्था गर्नका लागि काम गर्ने बताएका छन् । बुधबार प्रतिनिधीसभामा निर्वाचित भएपछि प्रमाणपत्र ग्रहण कार्यक्रममा बोल्दै उनले यस्तो बताएका हुन् ।

जनमत पार्टीका अध्यक्ष डा. राउतले सप्तरीमा ६६ हजार बालबालिका कुपोषित रहेको बताउँदै कुपोषण हटाउन आफू सक्रिय रहने समेत उल्लेख गरे ।

एक घर एक रोजगारी, किसानलाई मलखाद्य, पूर्ण साक्षरता जिल्ला, कृषि ऋणलगायतका कुराहरु आफ्नो प्राथमिकतामा रहेको उनले जानकारी दिए ।

पूर्व स्वास्थ्य तथा जनसंख्यामन्त्री उपेन्द्र यादवलाई भारी मतान्तरले पराजित गरेका राउतले ३५०४२ मत प्राप्त गरेका थिए । जनता समाजवादी पार्टीका अध्यक्षसमेत रहेका यादवले १६९६९ मत ल्याए । राउतसँग यादव १८०६३ मतको भारती अन्तरले पराजित भएका हुन् ।