सुर्खेत – सल्यानमा पूजाको प्रसाद खाँदा सल्यानमा एकै गाउँका झण्डै २ सय जना बिरामी परेका छन् । जिल्लाको बाग्चौर नगरपालिका–५ धारापानीस्थित बाहुनठाना गाउँका पूजाको प्रसाद खाँदा बिरामी परेका छन् ।
स्थानीय प्रेमबहादुर खत्रीको घरमा लगाइएको सत्यनारायणको पूजाको प्रसाद खाएर उनीहरू बिरामी परेका हुन् ।
बिरामी भएकामा झाडापखाला, पेट दुख्ने, चक्कर लाग्ने, ग्यास बढ्ने समस्या देखिएको स्थानीय स्वास्थ्य संस्थाका स्वास्थ्यकर्मी भुवन पुनले बताए ।
‘फुड पोइजनका कारणले बालबालिका, बूढाबूढी तथा वयस्क सबै प्रभावित भएका छन्, ’उनले भने,‘बिरामी परेकालाई उपचार गरेपछि झाडापखाला ठिक भएको तर पेट दुख्ने, ग्यास बढ्ने र चक्कर लाग्ने समस्या भने पूर्ण रुपमा नियन्त्रणमा आइसकेको छैन ।’
बिरामी भएका सबैलाई उपचारको लागि नगरपालिकाले स्वास्थ्यकर्मी लगायत औषधिको व्यवस्था गरेको बाग्चौर नगरपालिकाका स्वास्थ्य प्रमुख हरिबहादुर कठायतले बताए ।
