वीर अस्पतालमा आजबाट ८ बजेदेखि ओपीडी सेवा

काठमाडौं—मुलुककै जेठो वीर अस्पतालले १ साउनदेखि विहान ८ बजेबाट ओपीडी सेवा सुरु गरेको छ । अस्पतालका निर्देशक डा. सन्तोष पौडेलले सोमबारदेखि विहान ८ बजेदेखि साँझ ४ बजेसम्म ओपीडी सेवा संचालन हुने जानकारी दिए ।

उनकाअनुसार टिकट काउन्टर भने विहान ७ बजेदेखि नै खुल्ने छ भने प्रयोगशाला सेवामा पनि ७ बजेबाटै सुरु हुनेछ । ओपीडी सेवा विहानबाटै संचालनमा आउँदा सेवाग्राहीलाई सहजता हुनेछ ।

८ बजेदेखि ओपीडी सेवा सुरु गर्ने निर्णयप्रति चिकित्सा विज्ञान राष्ट्रिय प्रतिष्ठान (न्याम्स)का प्राध्यापकहरुले असन्तुष्टि जनाइरहेका छन् । न्याम्सका प्राध्यापकहरूको संस्था फ्याकल्टी डक्टर्स एसोसिएसन (एफडिए) ले विज्ञप्ति जारी गर्दै उक्त निर्णय अव्यवहारिक भएको बताउँदैं तत्काल संशोधन गर्न दबाब दिएको छ ।

एफडिएले सबैजसो विभागहरुको विहानको अडिट र क्लिनिकल कक्षाहरु विहान ८ बजे नै सुरु हुने बताउँदैं विहान ८ बजेबाट क्लिनिकल कार्य सुरु गर्दा गर्दा विहानको अडिट र क्लिनिक कक्षाहरुमा असर गर्ने एफडिएले दावी गरेको छ ।