डा. श्रीकृष्ण र डा. केशर अतिरिक्त सचिव, लम्की चुहा अस्पताल अब प्रदेश मातहतमा

काठमाडौं—सरकारले स्वास्थ्य तथा जनसंख्या मन्त्रालयमा रिक्त दुई अतिरिक्त सचिवमा पदमा बढुवा गरेको छ । २६ जेठमा बसेको मन्त्रिपरिषद्को बैठकले पोखरा स्वास्थ्य विज्ञान प्रतिष्ठानमा कार्यरत डा. श्रीकृष्ण श्रेष्ठ र सुर्खेत अस्पताल कार्यरत डा. केशरबहादुर ढकाललाई अतिरिक्त सचिवमा बढुवा गरेको सञ्चार तथा सूचना प्रविधीमन्त्री पृथ्वीसुब्बा गुरुङले जानकारी दिए ।

डा. श्रेष्ठ बाल रोग विशेषज्ञ हुन् भने डा. ढकाल स्त्री तथा प्रसूति रोग विशेषज्ञ हुन् । यसअघि बढुवा सिफारिस समितिले डा. श्रेष्ठ, डा. ढकालसँगै डा. सुधा देवकोटालाई १२ औं तहको अतिरिक्त सचिवका लागि सिफारिस गरेको थियो ।

सिफारिस तीन जनामध्येबाट डा. श्रेष्ठ र डा. ढकाल अतिरिक्त सचिवमा बढुवा भएका हुन् ।

यस्तै, मन्त्रिपरिषद्को उक्त बैठकले कैलाली जिल्लाको लम्की चुहा नगरपालिका मातहतको १५ शय्याको लम्की चुहा अस्पताललाई ५० शय्यामा स्तरोन्नती गरी सुदूरपश्चिम सरकारले सञ्चालन गर्ने गरी हस्तान्तरण गर्न स्वीकृत समेत प्रदान गरेको छ ।