वीरेन्द्रनगर—पूर्वी सुर्खेतको गुर्भाकोट नगरपालिका–८ मा रहेको मेहेलकुना अस्पतालमा शल्यक्रिया सेवा लिने बिरामीको संख्या बढ्दैं गएको छ । शल्यक्रिया गर्ने चिकित्सक अस्पतालमा उपलब्ध हुन थालेपछि शल्यक्रिया सेवा लिने बिरामीको संख्या बढ्दैं गएको हो ।
विगतमा सर्जनको अभावका कारण एपेन्डिक्स, हर्निया, हाइड्रोसिल, पायल्स, फिस्टुलाजस्ता शल्यक्रियाका लागि सुर्खेतको वीरेन्द्रनगर वा बाँकेको कोहलपुर र नेपालगञ्जसम्म जानुपर्ने बाध्यता थियो ।
तर, हाल मेडिकल सुपरिटेन्डेन्ट डा. अजय महतो आएपछि मात्र दुई महिनामा अस्पतालमै ४ वटा हर्निया, ३ वटा एपेन्डिक्स, २ वटा हाइड्रोसिल र दर्जनभन्दा बढी साना (माइनर( शल्यक्रिया सम्पन्न भएको अस्पतालका सूचना अधिकारी अप्सन चन्दले जानकारी दिए ।
चन्दकाअनुसार स्वास्थ्य बीमा कार्यक्रम लागू भएपछि अप्रेशनका लागि दैनिक १० देखि १५ जना बिरामी आउने गरेका छन् । डा. महतोले एपेन्डिक्स, हर्निया, हाइड्रोसिल, पायल्स, फिस्टुलालगायतका शल्यक्रियासँगै आवश्यक सल्लाह–परामर्शका लागि मेहेलकुना अस्पताल पूर्ण रूपमा तयार रहेको बताए ।
उनले सेवालाई अझ गुणस्तरीय र प्रभावकारी बनाउन निरन्तर प्रयास गर्ने प्रतिबद्धता व्यक्त गर्दै छिट्टै विशेषज्ञ ओपिडी सेवा पनि सञ्चालनमा ल्याउने योजना रहेको बताए ।
गुर्भाकोट नगरपालिकासहित भेरीगंगा नगरपालिका, लेकबेशी नगरपालिका, चिङ्गाड गाउँपालिका, सिम्ता गाउँपालिका, सल्यानको कालिमाटी गाउँपालिका, वनगाड कुपिण्डे नगरपालिका तथा आसपासका जिल्लाबाट समेत बिरामी उपचारका लागि मेहेलकुना अस्पताल आउने गरेका छन् ।
