काठमाडौं—बिहीबारको साँझ । कपनको भित्री इलाकामा एउटा फुटसल ग्राउण्ड अध्यारोले ढाक्नै लागेको छ । कुपन फुटसलमा गाडीबाट एकपछि अर्को खेलाडीहरु झरिरहेका छन् । ‘डक स्क्वायड’ लेखिएको टिसर्टमा हतार—हतार ग्राउण्डमा पसिरहेका सबै खेलाडीहरु सहरका चर्चित र व्यस्त विशेषज्ञ चिकित्सकहरुमा गनिन्छन् ।
बिरामी उपचार, सर्जरीसँगै पारिवारिक जीवनको व्यस्तताबीच पनि उनीहरुलाई ‘डक स्क्वायड’ जोडिरहेको नै रहेको छ । एक दुई वर्ष होइन्, ८ वर्षदेखि । त्यो जोडाइमा केहीले ‘सुपरग्लू’को काम गरिरहेको छ भने—त्यो फुटबल प्रेम नै हो । नत्र ८ वर्षदेखि चिकित्सकहरु न हरेक हप्ताको बिहीबार यसरी अबेर जम्मा हुन्थे, न त लेखिन्थ्यो ‘डक स्क्वायड’को यो कथा नै ।
कुरा हो, वि.सं. २०७१ सालको । त्रिवि शिक्षण अस्पतालका कलेजो तथा ग्यास्ट्रो सर्जन प्रा.डा. रमेशसिंह भण्डारी अष्ट्रेलिया पढ्न गएका थिए । त्यहीबेला उनले अष्ट्रेलियाका चिकित्सकहरु चिकित्सककै फुटबल टिम बनाएर १५—२० वर्षदेखि खेलिरहेको देखे । अहिलेका यी व्यस्त सर्जन अष्ट्रेलियाबाट डिग्री र सीपमात्रै लिएर फर्किएनन्, डाक्टरहरुको त्यस्तै फुटबल टिम बनाउने लक्ष्य लिएर नेपाल फर्किए ।
![](https://www.healthaawaj.com/wp-content/uploads/2023/09/IMG_5327.jpg)
नेपाल फर्केपछि वि.सं. २०७२ सालमा डाक्टरहरुकै फुटसल टिम बनाउने आफ्नो लक्ष्यमा काम गर्न सुरु गरे । चिकित्सकहरुलाई जोड्दैं गए । डा. लव श्रेष्ठसँगको रमाइलो प्रसंगबाट सुरु गरौं । काठमाडौं मेडिकल कलेज (केएमसी)मा डा. भण्डारी हाउस अफिसरका रुपमा काम गर्दाका चिरपरिचित थिए -डा. लव । किनभने उनी त्यसबेला केएमसीमै एमबीबीएस पढिरहेका थिए । वि.सं. २०७२ मा उनी आईओएममा एमडी पढिरहेका थिए । त्यहीबेला आफन्त बिरामी भए ।
चिनिरहेका त्रिविमा फ्याकल्टी डा. भण्डारीलाई फोन गरेर भने, ‘दाइ मेरो अंकल बिरामी हुनुभयो हेरिदिनुपर्यो ?’
डा. रमेशले भने, ‘तिम्रो बिरामी म हेर्दै हेर्दिन ?’
‘किन ?’
‘एउटा शर्तमा हेरिदिन सक्छु ?’
‘के शर्त ?’
‘हाम्रो साँझपख फुटसल गेम छ, तिमी आएर खेल्ने भए हेर्छु । नत्र हेर्दिन ?’
‘म आउँदिन दाइ । मलाई फुटसल खेल्न नै आउँदैन ।’
![](https://www.healthaawaj.com/wp-content/uploads/2023/09/IMG_5279.jpg)
‘तिमी उभिन भएपनि आउ ?’ डा. लव त्यो दिन बेलुका डा. भण्डारीले बोलाएको ठाउँमा पुगे । त्यही दिनदेखि उनी गोलकिपर बस्न थालेको ८ वर्ष भइसकेको छ । डा. लवको स्मरणमा फुटसलबाट उनले एकदमै नजिकका साथी कमाएका छन् । सुरुमा फुटसल खेल्न आनाकानी गरेका उनले यो अवधिमा अनुभवमात्रै हासिल गरेका छैनन् दुई पटक उत्कृष्ट गोलकिपरका एवार्ड पनि हात पारिसकेका छन् ।
यो त डक स्क्वायडको सुरुवाती समयको कथा हो । अहिले त मुलुकका गनेचुनेका २०—२५ जना विशेषज्ञ चिकित्सकहरु टिममा छन् । दुई टिम बनाएर आपसमै फुटसल खेल्न सक्ने डक स्क्वायड परिवार तयार भएको छ । ‘पहिले टियुटिएच डक्टर फुटसल क्लबका रुपमा थियो,’ डट स्क्वायडका नेतृत्वकर्ता डा. भण्डारी भन्छन्, ‘अहिले सबै अस्पतालका चिकित्सकहरु टिममा भएपछि यो डक स्क्वायड भएको छ ।’ उनकाअनुसार ८ वर्षदेखि रुचिले चिकित्सकहरुलाई डक स्क्वायडमा जोडिरहेको छ ।
डा. अपार लामिछानेका प्लास्टिक सर्जन हुन् । ७ वर्षदेखि डक स्क्वायडमा आवद्ध रहेका उनलाई आफूहरुबीचको बोन्डिङले नै यहाँसम्म ल्याएको अनुभव हुन्छ । ‘नयाँ फ्याकल्टीका साथीहरुसँग संगत र रमाइलो पनि छ,’ वीर अस्पतालका यी सर्जन सुनिए, ‘म अहिले डिफेन्स र स्ट्राइकर दुवै रोलमा रमाइरहेको छु ।’
![](https://www.healthaawaj.com/wp-content/uploads/2023/09/IMG_5316.jpg)
डा. दमनराज पौडेल त्रिवि शिक्षण अस्पतालका बाल रोग विशेषज्ञ हुन् । ‘एक्ससाइजकै रुपमा मैले फुटसललाई हेरेको छु,’ बालबालिकाको किड्नी रोगका विशेषज्ञसमेत रहेका उनले भने, ‘व्यस्त र मनोटोनस जीवनशैलीलाई चलायमान बनाउन डक स्क्वायड बनायौं । यसको नेतृत्व डा. रमेशले गर्नुभयो ।’ डा. पौडेल डक स्क्वायडमा सुरुदेखि नै आवद्ध भएर फुटसल खेलिरहेका छन् । टिमको उद्देश्य फुटसल खेल्नेसँगै प्रोफेसनल कुराहरु सेयरिङ र उदाहरणीय फुटसल क्लब बनाउने छ । ‘नेपालका एकसे एक एक्पर्ट चिकित्सकहरु यहाँ छन्,’ डिफेन्डरको भूमिका निभाइरहेका उनले भने, ‘हामीहरु मिलेर केही राम्रो काम गर्ने चाहना पनि छ ।’ खेल अवधिको दुई घण्टा मोबाइल अफ गरेर खेल्ने भएकाले मेडिटेसनजस्तै भइरहेको अनुभव उनको छ ।
पाटन अस्पतालका क्यान्सर रोग विशेषज्ञ डा. अरुण शाही डक स्वाक्यडमा फुटसल खेल्नकै लागि हरेक बिहीबार साँझ पाटनबाट कपन पुग्छन् । यो नियमितता बनेको तीन वर्ष भइसकेको छ । ह्याम्स अस्पतालमा कार्यरत रहँदा नै उनी डक स्क्वायडमा जोडिएका हुन् । भन्छन्, ‘हप्ताको एक दिन त आफ्ना लागि पनि त निकाल्नुपर्यो । म त सानैदेखि फुटबल खेल्ने मान्छे बिहीबार कहिले आउला भन्दैं दिन गनेर बसिरा’को हुन्छु ।’ मैदानमा सबै रोलमा फिट हुने उनी मिडफिल्डर र स्टाइकरमा धेरैजसो खेलिरहेका हुन्छन् । मनपर्ने रोल मिलफिल्डरको बताउने उनी १० नम्बर जर्सी मन पराउँछन् । डा. शाहीकाअनुसार चिकित्सकीय अनुभव साटासाटले गर्दा झन टिमको एकता बलियो बनेको छ । ‘वीकेन्डमा कहिलेकाही पारिवारिक जमघट पनि हुन्छ, त्यही कारण हामी परिवारै भएका छौं,’ उनले अनुभव साटे ।
त्रिवि शिक्षण अस्पतालका रेडियोलोजिष्ट हुन् —डा. प्रदीपराज रेग्मी । वि.सं. २००६ मा एमबीबीएस पढ्दै गर्दा उनले गुरुका रुपमा डा. भण्डारीलाई चिनेका हुन् । फुटबलमा रुचि राख्ने रेग्मीको खेल देखेका उनले टिममा उनलाई छुटाउने कुरै थिएन । दैनिक १२ घण्टा लामो ड्युटीकाबीच उनी बिहीबारका लागि पर्खिरहेका हुन्छन् । ‘यो एउटा मिल्ने ग्रुप पनि भयो,’ प्रायःजसो मिडफिल्डमा दौडिने उनले कारण खुलाए, ‘एउटै फिल्डका भएकाले परिवारजस्तो पनि छौं ।’
![](https://www.healthaawaj.com/wp-content/uploads/2023/09/IMG_5285.jpg)
लगनखेलस्थि काठमाडौं आई सेन्टरका आँखा रोग विशेषज्ञ डा. अपूर्वरत्न ताम्राकार कलेज जीवनदेखि नै फुटबलका सौखिन हुन् । लेफ्ट विङगरका रुपमा डट स्क्वायडमा खेलिरहेका उनी त्यही रोलमा आफूलाई प्रमाणित गरिरहेका छन् । ‘डक स्क्वायड एकदमै कम्पिलिट टिम छ,’ मोतियाविन्दु र पर्दा रोग फेलो उनले भने, ‘सबै पोजिशन वेल कभर्ड छ ।’
डा. राकेश घिमिरे त्रिवि शिक्षणकै फर्माकोलोजी विभागका चिकित्सक हुन् । ५ वर्षअघि फ्याकल्टी ज्वाइन गरेका उनले त्यही बेलादेखि यही टिमबाट फुटसल खेल्न थालेका हुन् । ‘सुरुदेखि नै एकदमै फ्रेण्डली वातावरणमा फुटसल खेल्न थालियो । अहिले त छोड्नै नसकिने भयो,’ उनले भने । स्ट्राइकरमा खेल्न रुचाउने उनी कहिलेकाही ब्याकमा पनि खेलिरहेका हुन्छन् । खेलले शारीरिक, मानसिक रुपमा एकदमै राम्रो गर्नुका साथै प्रोफेसनहरुको टिम भएकाले एकअर्काका अनुभवसमेत आदान—प्रदानको अवसर जुरेको उनले बताए ।
डा. प्रवीण प्रसाद त्रिविको फर्माकोलोजी विभागमा कार्यरत छन् । उनकै विभागका डा. घिमिरे फुटसल टिममा जोडिएका थिए । फुटसल मैदानका रोचक कथा डा. घिमिरेबाट सुनेपछि डा. प्रवीण पनि आफूलाई रोकिरहन सकेनन् र डक स्क्वायडमा आवद्ध भए । अहिले उनी स्क्वायडको डिफेन्डरको भूमिका रमाइरहेका छन् ।
![](https://www.healthaawaj.com/wp-content/uploads/2023/09/IMG_5254.jpg)
ह्याम्स अस्पतालका अर्थोपेडिक सर्जन डा. सन्दीप भण्डारी सन् २०१८ देखि नै डक स्क्वायडमा ज्वाइन गरेका हुन् । पहिलेदेखि नै फुटसल खेल्ने उनलाई डक स्क्वायडमा आवद्ध भएपछि एकदमै राम्रो र सशक्त टिम पाएको अनुभव भएको छ । ‘म अहिले एकदमै रमाइरहेको छु,’ यी ज्वाइन्ट रिप्लेसमेन्ट र स्पोर्टस सर्जन भन्छन्, ‘फुटसलसँगै म फ्रेण्डसीप र ब्रदरहुडमा पनि इन्जोय गरिरहेको छु ।’ उनी नियम र सतकर्ता अपनाएर खेल्न सुझाव दिन्छन् ।
सरुवा रोग विशेषज्ञ डा. प्रभात अधिकारी डाँफे केयरमार्फत बिरामीलाई सेवा दिन्छन् । ‘नसर्ने रोगको जड विलासी जीवनशैली र खानपान हो । हामी बिरामीलाई सिकाउँछु तर आफैले त्यो पालना गरिरहेका हुँदैनौं,’ डा. अधिकारी भन्छन्, ‘त्यही कारण पनि डक स्क्वायडमा हामी नियमित फुटसल खेल्छौं ।’ उनी विगत ४ वर्षदेखि डक स्क्वायडमा फुटसल खेलिरहेका छन् । ‘यो मेरो वेस्ट टिम हो, यसमा एकदमै अनुपम स्पोर्टसम्यानसीप छ,’ उनी भन्छन्, ‘त्यति धेरै प्रतिस्पर्धा छैन, खेल्ने फ्रिडम अफ स्टाइल छ । ठूलो ग्राउण्ड भएकाले स्टामिना, गेम र स्कील पनि इम्प्रुभ भएको छ ।’
काठमाडौं मेडिकल कलेजका एशोसिएट प्रोफेसर समेत रहेका डा. विनोद राउत डेन्टल सर्जन पनि हुन् । उनी ५ वर्षदेखि डक स्क्वायडमा रहेर फुटसल खेलिरहेका छन् । ‘शारीरिक र मानसिक रुपमा फिट रहनका लागि फुटसल निकै उपयोगी सावित भएको छ,’ उनले भने, ‘फ्रेण्डसीपलाई पनि कायम राख्न यो सहयोगी बनेको छ ।’
![](https://www.healthaawaj.com/wp-content/uploads/2023/09/IMG_5275.jpg)
डा. विशेष खनाल चिकित्सा क्षेत्रमा आर्टिफिसियल इन्टेलीजेन्समा एडभान्स प्रविधीको विकासमा लागिरहेका छन् । बिरामीसँग सम्बन्धित डाक्टरीभन्दा अलि भिन्नै फिल्डका भएपनि उनलाई पनि डक स्वाक्यडले स्वागत गरेको छ । डक स्क्वायडमा एक वर्षदेखि जोडिएका उनी विङ्गरका रुपमा खेल्छन् ।
रवीन्द्र बस्नेत ह्याम्स अस्पतालका फिजियोथेरापिष्ट हुन् । उनी विगत ५ वर्षदेखि डक स्क्वायडमा रहेका डिफेन्डरको भूमिका निभाइरहेका छन् । अन्य चिकित्सक र दुई जना अस्पताल स्टाफहरु पनि डक स्क्वायडमा आवद्ध छन् । खेलबाहेक अनुभव आदान—प्रदान, पारिवारिक वातावरण स्क्वायडले जुराएको सबैभन्दा राम्रो पक्ष हो । बेला—बेलामा उनीहरु फ्यामिलीको ग्यादरिङ पनि गर्छन् । अधिकांश कन्सल्ट्यान्ट चिकित्सक हुनु डक स्क्वायडको मुख्य विशेषता हो । डक स्क्वायडले भविष्यमा चिकित्सा शिक्षा र स्वास्थ्य सेवामा ग्रामीण र विकट इलाकाहरुमा सामाजिक काम गर्ने योजनासमेत बनाएको छ ।
![](https://www.healthaawaj.com/wp-content/uploads/2023/09/IMG_5286.jpg)
![](https://www.healthaawaj.com/wp-content/uploads/2023/09/IMG_5264.jpg)