एक सातामा मात्रै ३५ जनालाई कोभिड-१९ संक्रमण, ७१ जना डेंगीका बिरामी

काठमाडौं—पछिल्लो एक सातामा मात्रै देशभर ३५ जनामा कोभिड—१९ संक्रमण भएको पाइएको छ । बुधबार इपिडिमियोलोजी तथा रोग नियन्त्रण महाशाखा (इडिसिडी)ले सार्वजनिक गरेको तथ्यांकअनुसार पछिल्लो ७ दिनमा ३५ जना कोभिड—१९ संक्रमित फेला परेका छन् ।

पछिल्लो हप्ता सबैभन्दा बढी बागमती प्रदेशमा २४ जनामा कोभिड—१९ संक्रमण भएको छ । यस्तै, कोशी प्रदेशमा ६ जना, मधेश प्रदेशमा ३ जना र गण्डकी प्रदेशमा २ जनामा कोभिड—१९ संक्रमण भएको तथ्यांकमा छ । यो अवधिमा एक जनाको कोभिड—१९ बाट मृत्यु भएको तथ्यांकमा छ ।

पछिल्लो २४ घण्टामा ५ जनामा कोभिड—१९ संक्रमण भएको छ भने कोभिड—१९ का केसहरु ३१ जिल्लामा पाइएका छन् ।

इडिसिडीको तथ्यांकअनुसार पछिल्लो समय डेंगीका बिरामी पनि बढिरहेका छन् । बुधबारसम्म देशभरका ७३ जिल्लामा डेंगीका बिरामी फेला परेका छन् । पछिल्लो सात दिनमा ७१ जनामा डेंगी संक्रमण भएको महाशाखाले जनाएको छ ।