जुम्ला—कर्णाली स्वास्थ्य विज्ञान प्रतिष्ठान, जुम्लाको रिक्त रजिष्ट्रारमा लक्ष्मीचन्द्र महत नियुक्त भएका छन्। स्वास्थ्य तथा जनसंख्या मन्त्री प्रदीप पौडेलले प्रतिष्ठान ऐन २०६८ तथा मन्त्रालय मातहतका निकायका पदाधिकारीको नियुक्ति र मनोनयन सम्बन्धी मापदण्ड, २०७३ बमोजिम प्रतिष्ठानका उपकुलपति डा. पुजन रोकायाले गरेको सिफारिसका आधारमा महतलाई नियुक्त गरेका हुन् ।
चन्दननाथ नगरपालिका—१० बोहरागाउँका महत कर्णालीकै वौद्धिक, शालीन र अनुभवी व्यक्तिका रूपमा परिचित छन्। हाल त्रिभुवन विश्वविद्यालयमा विद्यावारिधि अध्ययनरत महतको शोधकार्य जनस्वास्थ्यसँग सम्बन्धित छ। उनले वि.सं. २०७७ सालदेखि घरायसी खानेपानी, सरसफाइ तथा स्वच्छता ९ध्ब्क्ज्० सेवा र त्यसको पानीजन्य रोगसँगको सम्बन्ध विषयमा अनुसन्धान गरिरहेका छन्।
उनले २०५७ सालमा स्नातकोत्तर तथा २०६९ सालमा एमफिल पूरा गरेका थिए। विगत साढे दुई दशकदेखि नेपाल सरकारका विभिन्न द्विपक्षीय तथा बहुपक्षीय परियोजना र कार्यक्रममा व्यवस्थापकीय जिम्मेवारी सम्हाल्दै आएका महत पछिल्ला वर्षहरूमा संयुक्त राष्ट्रसंघ र यूएसएआईडीका परियोजनामा क्षमता विकास तथा प्रशिक्षण विशेषज्ञको रूपमा कार्यरत थिए।
नीति अनुसन्धान, परियोजना व्यवस्थापन र संस्थागत क्षमता विकासका क्षेत्रमा विशेष दक्षता हासिल गरेका महतको अनुभव र नेतृत्वले प्रतिष्ठानलाई थप प्रभावकारी बनाउन मद्दत पुग्ने विश्वास गरिएको छ।
