अघि बढ्यो सुर्खेत मेडिकल कलेज निर्माण प्रक्रिया

वीरेन्द्रनगर—वर्षौपछि सुर्खेत मेडिकल कलेजको निर्माण प्रक्रिया अघि बढेको छ । यो वर्ष विस्तृत परियोजना प्रतिवेदन (डिपीआर) निर्माण गर्न लागिएको हो ।

आर्थिक वर्ष २०७४/७५ मा सरकारले मेडिकल कलेजको स्थापना गर्ने घोषणा गरेको थियो । मेडिकल कलेज स्थापनाका लागि वातावरणीय प्रभाव मूल्याङ्कन (इआईए) र गुरुयोजना तयार पारिएको छ ।

सरकारले २९ असार २०७९ मा गुरुयोजना स्वीकृत गरेको थियो । यसैगरी ७ मंसिर २०८० मा वातावरणीय प्रभाव मुल्याङ्कन (इआईए) स्वीकृत भएको थियो ।

‘इआईए र गुरुयोजना स्वीकृत भएको छ । यो वर्ष डिपीआर निर्माण गर्न लागिएको छ,’ सुर्खेत मेडिकल कलेज पूर्वाधार निर्माण विकास आयोजनाका इन्जिनियर शंकर तिमल्सिनाले भने ।

सुर्खेतको वीरेन्द्रनगर नगरपालिकाको सामुदायिक वनमा सो कलेज निर्माण हुनेछ । मेडिकल कलेजको कुल लागत एक अर्ब ७० करोड रुपैयाँ हुने अनुमान गरिएको छ ।