काठमाडौं—बालेन्द्र शाहको नेतृत्वमा बन्ने सरकारमा निशा मेहता स्वास्थ्य तथा जनसंख्यामन्त्री बन्ने निश्चित भएको छ । राष्ट्रिय स्वतन्त्र पार्टी (रास्वपा)को एकल बहुमतको सरकारमा सुनसरी इनरुवाकी निशा स्वास्थ्यमन्त्री बन्ने टुंगो लागेको रास्वपा निकट स्रोतले जनाएको छ ।
रास्वपाका सभापति रवि लामिछाने र वरिष्ठ नेता बालेन्द्र शाहबीच निशालाई स्वास्थ्यमन्त्री बनाउने सहमति जुटेको हो । ‘उहाँ (निशा)लाई स्वास्थ्यमन्त्री बनाउने टुंगो लागेको छ,’ रास्वपाका एक नेताले हेल्थआवाजसँग भने, ‘अन्तिम अवस्थामा फेरबदल नभएमा उहाँ स्वास्थ्यमन्त्री हुने पक्का हो ।’
स्वास्थ्यमन्त्री हुन लागेकी निशा पेशाले नर्स हुन् ।
३८ वर्षीया उनी रास्वपामा समानुपातिकबाट सांसद बनेकी हुन् । उनले भारतको ग्वालियर युनिभर्सिटीमा नर्सिङमा स्नातकोत्तर गरेकी छन् ।
इनरुवा इंग्लिस बोर्डिङ स्कुलकी उत्पादन उनले केही समय विराट नर्सिङ होममा समेत काम गरेकी थिइन् । उनी सुरुदेखि नै रास्वपामा आवद्ध भएर सक्रिय थिइन् ।
