विराटनगर – प्रदेश १ मा कोरोना विरूद्धको खोप आइपुगेको छ । स्वास्थ्य सेवा विभागले पठाएको कोरोना विरुद्धको खोप प्रदेश १ को राजधानी विराटनगरमा सोमबार आइपुगेको हो ।
पहिलो चरणमा प्रदेश १ का सबै १४ जिल्लालाई पर्याप्त हुने गरी खोपको ९६ हजार डोज आएको प्रदेशको सामाजिक विकास मन्त्रालयले जनाएको छ । मन्त्रालयका अनुसार माघ १३ गते बेलुकासम्म प्रदेशभरिका जिल्लाहरुमा आवश्यकता अनुसार खोप पुगिसक्ने छ ।
प्रदेशभरका प्रत्येक जिल्ला अस्पताल र केही ठुला अस्पतालहरुबाट प्रथम चरणमा स्वास्थ्यकर्मी, सरसफाईकर्मी र सुरक्षाकर्मीलाई कोरोना विरुद्धको खोप लगाउने प्रदेश सरकारको योजना छ । प्रथम चरणमा ३५ हजार ५ सय ७६ जनालाई कोरोना विरुद्धको खोप लगाउने तयारी रहेको प्रदेश सरकारको सामाजिक विकास मन्त्रालयका स्वास्थ्य महाशाखा प्रमुख सागर प्रसाईले जानकारी दिए ।
पहिलोपटक खोप लगाइसकेका व्यक्तिले १ महिनापछि पुनः दोश्रोपटक खोप लगाउनुपर्ने भएकाले प्रदेशलाई हाल कुल ७१ हजार १ सय ५२ डोज कोरोना विरुद्धको खोप चाहिएको छ । तर पहिलो चरणमै सोमबार ९६ हजार डोज कोरोना विरुद्धको खोप विराटनगर आइपुगेकाले हाल प्रदेश सरकारसँग पहिलो चरणका लागि पर्याप्त खोप रहेको स्वास्थ्य महाशाखा प्रमुख प्रसाईले बताए । कोरोना विरुद्धको खोप भने विराटनगरस्थित प्रदेश स्वास्थ्य आपुर्ति व्यवस्थापन केन्द्रमा भण्डारण गरिएको छ ।
एक भायलमा १० डोज खोप हुन्छ । त्यसका लागि आवश्यक पर्ने एडिनालिन इन्जेक्सन र सिरिन्ज समेत आएको छ ।
तीन अस्पतालबाट खोप लगाइने
मोरङका नागरिकका लागि विराटनगरका तीन अस्पताललाई केन्द्र तोकिएको छ । कोशी अस्पताल, विराट मेडिकल एण्ड टिचिङ र नोबेल मेडिकल एण्ड टिचिङ अस्पतालमा यो खोप लगाइने व्यवस्था मिलएको छ ।
जिल्लास्थित कोभिड सुरक्षा उपचार समन्वय समितिले अन्य जिल्लाका हकमा केन्द्र तय गर्नसक्नेछ । सरकारले अन्य जिल्लामा जिल्ला अस्पतालमा खोप केन्द्रीत गर्नेछ ।
त्यसपछि जिल्लास्थित कोभिड सुरक्षा उपचार समन्वय समितिले त्यसको व्यवस्थापन मिलाएर नागरिकलाई लगाउने छ । त्यसबाहेक झापाको मेची अस्पतालमा समेत संघीय सरकारले नै केन्द्र तोकेको छ । कुन जिल्लामा कति डोज खोप पठाउने भन्ने विषयमा भने अहिले गृहकार्य भईरहेको मन्त्रालयले जनाएको छ ।
