काठमाडौं—सामाजिक सञ्जालका कारण बालबालिकामा मानसिक दबाब सिर्जना भएको सरोकारवालाहरुले बताएका छन् । आइतबार राजधानीमा बालबालिका तथा सञ्चार समूहले आयोजना गरेको कार्यक्रममा सरोकारवालाहरुले उक्त कुरा बताएका हुन् ।
सिविसकी विमला ज्ञवालीले सामाजिक सञ्जालका कारण बालबालिकामा मानसिक दबाब, आत्मविश्वासको कमी र आक्रामकता बढेको बताउँदै मिडियाले यस्ता विषयलाई प्राथमिकतामा राख्नुपर्ने धारणा राखिन्।
पत्रकार रमेश गिरीले बालश्रम, यौन दुर्व्यवहार, विद्यालय छोड्ने दर र अभिभावकहीन बालबालिकाको अवस्थाजस्ता समस्या मानव अधिकारका मुद्दा भएकाले अनुसन्धानसहित उठाउन आवश्यक छ भने।
सञ्चार समूहका संयोजक गोविन्द खड्काले बाल नीति र स्थानीय तहका कार्यविधिमा कमजोरी रहेको उल्लेख गर्दै ग्रामीण क्षेत्रका बालबालिकाका समस्या मिडियामा न्यून रूपमा प्रस्तुत हुने टिप्पणी गरे।
सिविसका उमङ्ग मैनालीले उद्धार, पुनर्स्थापनाका चुनौती र कानुनी सहायता पहुँचमाथि प्रकाश पार्दै तथ्य–आधारित समाचारले राज्य संयन्त्रलाई जवाफदेही बनाउने बताए।
पत्रकारहरू सरोज ओझा, सीता शर्मा र इन्द्रसरा खड्काले बाल समाचार लेख्दा पहिचान संरक्षण, कानुनी संवेदनशीलता र तथ्य पुष्टि अनिवार्य भएको अनुभव साझा गर्दै बाल सुरक्षा निर्देशिकाको प्रभावकारी प्रयोग गर्नुपर्ने बताए।
