स्वास्थ्यकर्मीमाथि आक्रमणपछि रौतहटमा स्वास्थ्य सेवा ठप्प

जनकपुर-रौतहटको राजपुर नगरपालिकाका स्वास्थ्यकर्मीहरु आन्दोलनमा उत्रेका छन् । स्वास्थ्यकर्मीमाथि हातपात गर्ने दोषीलाई कारवाही र शान्ति सुरक्षाको माग गर्दै बिहीबार विहानैदेखि सबै सेवा ठप्प पारेर उनीहरु आन्दोलनमा उत्रिएका हुन् ।

क्वारेन्टाइनमा बस्नेहरूको पीसीआर रिपोर्ट निगेटिभ आएपछि उनीहरुलाई घर पठाउनुअघि आरडिटी चेक गर्दा बुधबार रिपोर्ट पोजिटिभ आएपछि आक्रोशित समूहले स्वास्थकर्मीमाथि आक्रमण गरेका थिए । आक्रमणबाट नगर स्वास्थय सह–संयोजक रामनरेस साहसहित दुईजना स्वास्थकर्मीको टाउको गम्भीर चोट लागेको छ ।

घटनालगत्तै नगरक्षेत्र अन्तर्गतका क्वारेन्टाइनलगायतका सबै स्वास्थ्य सेवा प्रभावित भएका छन् । नगरक्षेत्र अन्तर्गतको सबै क्वारेन्टाइन, आइसोलेसन र स्वास्थ्य उपचौकी तथा प्राथमिक स्वास्थ केन्द्रको समेत सेवा बन्द भएको बताइएको छ । राजपुर नगरक्षेत्रमा रहेको क्वारेन्टाइनमा हाल दुई हजार सातसय ११ जना रहेका छन् ।