सिरहामा ३ स्थानीय तहमा आधारभुत अस्पतालकाे शिलान्यास

धनुषा – सिरहाको १७ स्थानीय तहमध्ये ५ वटा स्थानीय तहलाई परेको आधारभूत अस्पतालमध्ये दुईवटा स्थानीय तहले मात्र अस्पतालको  शिलान्यास गरेका छन् । सोमबार अस्पताल शिलान्यास गर्ने स्थानीय तहमध्ये धनगढीमाई नगरपालिका र विष्णुपुर गाउँपालिका  रहेको छ ।

धनगढीमाई नगरपालिकामा १५ शैय्या र विष्णुपुर गाउँपालिकामा १० शैय्याको अस्पतालको शिलान्यास गरिएको हो ।

यसअघि नै गोलबजार नगरपालिकाले १५ शैय्याको शिलान्यास गरिसकेका छन् भने सुखीपुर नगरपालिका र सिरहा नगरपालिकाले प्राविधिक कठिनाई देखाउँदै आज अस्पताल शिलान्यास गर्न नसकिएको बताइएको छ । धनगढीमाई नगरपालिका वडा नं. ९ स्थित नयनपुर अस्पताल हाताभित्र धनगढीमाई नगरपालिका सिरहाका नगरप्रमुख हरिनारायण चौधरीले १५ शैय्या अस्पतालको शिलान्यास गरेका हुन् ।

यसअघि नगरपालिकाले आफ्ना नगर क्षेत्रभित्रका स्थानीयहरुलाई सर्वसुलभ तरिकाले स्वास्थ्य सेवा दिन आफ्नै श्रोतसाधनबाट नयनपुर स्वास्थ्य चौकीलाई अस्पताल संचालन गरिरहेको छ । संघीय सरकारको लागतमा प्रथम चरणमा आज देशभर तोकिएका ३९६ मध्ये ५ देखि १५ शैय्याको अस्पताल शिलान्यास हुने कार्यक्रम थियो । सिरहामा ५ स्थानीय तहमध्ये ३ वटा स्थानीय तहलाई १५  शैय्य र दुईवटा स्थानीय तहलाई १० शैय्याको अस्पताल परेको थियो।