महाकाली अस्पतालका १४ जना कर्मचारीमा कोरोना संक्रमण

धनगढी-कञ्चनपुरको महाकाली अस्पतालका १४ जना कर्मचारीमा कोरोना संक्रमण पुष्टि भएको छ । अस्पतालको प्रशासन फाँटमा कार्यरत ५ जना कर्मचारी, ४ जना स्टाफ नर्स र ५ जना कार्यलय सहयोगीमा कोरोना पोजेटिभ देखिएको महाकाली अस्पताल व्यवस्थापन समितिका अध्यक्ष कृष्णदत्त जोशीले बताए ।

केहीलाई आइसोलेसन र केहीलाई होम आइसोलेसनमा बस्ने गरी व्यवस्था मिलाइएको उनले बताए ।

‘संक्रमण बढिरहेका बेला अस्पतालको जनशक्ति कम थियो । त्यसैमा कर्मचारीलाई संक्रमण हुँदा समस्या थपिएको छ,’ अध्यक्ष जोशीले भने, ‘अस्पतालमा बेड थपेर कोरोना संक्रमितको उपचारका लागि थप व्यवस्थित गर्ने तयारीमा छौ ।’

उनले बिहिबारदेखि अस्पतालमा ६ वटा आइसीयु बेड तथा ४ वटा भेन्टिलेटर बेड थप गरेर अस्पतालले सेवा दिने बताए । महाकाली अस्पतालको आइसोलेसनमा अहिले लक्षण देखिएका ३८ जना बिरामी राखिएको छ भने लक्षण नदेखिएकालाई आइसीएचको भवनमा राखिएको छ ।